Tohfa e Khawateen husne AkhLaaq v maashrat


                     ﺑِﺴْــــــــــــــــﻢِﷲِﺍﻟﺮَّﺣْﻤٰﻦِﺍلرَّﺣِﻴﻢ
           ✰══❖══✰═══❖══✰

         鹿 *TOHFA-E-KHAWATEEN* 鹿

   *⊙_HUSNE AKHLAAQ_MASHRAT ⊙*

╨───────────────────── 
*┱✿ Husne Akhlaaq wale Ka Martaba_,*

┱ _ Hazrat Ayesha Raziyallahu Anha se rivayat Hai k Huzoor Aqdas Sallallahu Alaihivasallam ne irshad farmaya k bila shuba momin banda Apne Achchhe Akhlaaq ki vajah se Raato Raat Namaz mai khade rehne wale aur Din bhar Roza rakhne wale Aadmi Ka darja pa leta Hai -,"

* Mishkaatul Masabeh- 431 Ba hawala Abu Daowd,*

┱_ Achchi Khaslat v adaat jise naseeb ho Jaye to use Duniya v Akhirat ki khair mil gayi ,Allah Ta'ala ke yaha'n Achchhe Akhlaaq Ka bahut vazan hai , Ek Hadees mai irshad Hai k qayamat ke din Sabse Zyada bhari Cheez Jo momin ke tarazu Mai rakhi jayegi wo Achchhe Akhlaaq honge ,

┱_ Achchhe Akhlaaq Ka mafhoom Bahut wasi hai ,Allah ki Saari makhlooq Ka huqooq wajiba Ada karna ,Chhoto per Shafqat karna bado Ka ikraam Karna ,Sabko Apni Zubaan aur haath ki Takleef se mehfooz rakhna aur aage pichhe sabki khair Khwahi karna ,Dhoka na dena , Khayanat na karna ,Sach bolna ,Narmi Akhtyar Karna ,Har ek se uske martabe ke mutabiq bartaav karna ,Jo Apne liye pasand Kare Wahi doosre ke liye pasand karna ,Sahi Mashwara Dena ,BadZubani se bachna ,Haya aur Sharm Akhtyar Karna, Makhlooq ki haajate poori Karna ,Sabke Saath khoobi Ka bartaav karna,Beja Gussa na Karna ,Hasad v Keena ko Dil mai jagah na dena , isi tarah Bahut si baate hai'n Jinko husne Akhlaaq Ka mafhoom Shamil Hai ,

┱_ Hazrat Ma'az aur Hazrat Abu Moosa Raziyallahu Anhum ko jab Rasulullah Sallallahu Alaihivasallam ne Yaman ke Aamil bana Kar bheje to wasiyat farmayi k Logo ke Saath Asaani Ka bartaav kijo aur sakhti se na pesh aaiyo aur unko Khush khabriya'n Sunaiyo aur Nafrat na dilaiyo aur Aapas mai muttafiq rahiyo aur ikhtilaf na rakhiyo _,"

* Bukhari Sharif,*

╨───────────────────── 
*┱✿ Jo Apne Liye Pasand Kare Wahi Doosro Ke Liye Pasand Kare,*

┱ _ Hazrat Anas Raziyallahu Anhu Rivayat farmate hai'n k Rasulullah Sallallahu Alaihivasallam ne farmaya k Qasam Hai us zaat ki Jiske Qabze mai Meri Jaan Hai ,Koi Shakhs us Waqt Tak Momin nahi hoga Jab Tak Apne ( Momin ) Bhai ke liye Wahi Pasand Kare Jo Apne Liye Pasand Karta Hai _,"

* Mishkaatul Masabeh- 424 Ba hawala Bukhari v Muslim*

┱_ Hazrat Ma'az bin Jabal Raziyallahu Anhu farmate hai'n k Maine arz Kiya Ya Rasulallah Sallallahu Alaihivasallam Konsa imaan Afzal Hai ?

Aap Sallallahu Alaihivasallam ne Jawab mai irshad farmaya - Ye k Tu Allah Ke Muhabbat Kare aur Allah ke Liye Bugz rakhe aur Apni Zubaan ko Allah ki Yaad mai lagaye rakhe ,

Maine arz Kiya- iske Baad Kya karu ?
Farmaya k - Tu Logo ke Liye Wahi Pasand Kare Jo Apne Liye Pasand Karta Hai aur Unke Liye wo Na-Pasand Kare Jo Apne Liye Na-Pasand Karta Hai _,"

* Mishkaat _,*

┱_ Is Hadees se maloom hua k Sab logo ke Saath esa bartaav rakho k Jo Apne Liye Pasand ho wo Sab ke liye pasand ho aur Jo Apne Liye Achchha nahi samajhta usko Doosro ke liye bhi bura samjhe ,Maslan Apne zimme kisi Ka qarz aata ho to ye Khayal Kare k Mera qarz chahta hota to Jald se Jald Vasool karta ,Lihaza doosre ke Liye isi ko pasand Karu aur Jald Ada karu ,isi tarah agar Kisi per Apna qarz chahta ho to ye soche k agar mujh per kisi Ka qarz hota to Mai'n Mohlat Ka khwahish mand hota ,Lihaza mujhe chahiye k uske liye bhi Wahi Pasand karu Jo Apne Liye Pasand Karta ,Lihaza usko Mohlat du aur Mutalba mai sakhti na karu ,isi tarah har moqe aur maamle mai soch liya Kare ,

┱_ Dar Haqeeqat agar log Sirf isi ek Hadees per Amal Kar le to Kabhi Talluqaat mai bigaad na ho aur Sab Araam se Zindgi guzaare ,

╨───────────────────── 
*┱✿ Har Cheez Ke Saath Khoobi Ka Bartaav Zaruri Hai_,*

┱ _ Hazrat Shaddaad bin Aus Raziyallahu Anhu farmate hai'n k Rasulullah Sallallahu Alaihivasallam ki Do baate Maine ( Khususiyat ke Saath ) Yaad kar rakhi hai'n , Aap Sallallahu Alaihivasallam ne farmaya k - Bila Shubha Allah Ta'ala ne har Cheez ke Saath Khoobi Ka Bartaav karna zaruri qaraar diya Hai, Lihaza jab kisi ko ( Kisi Jaa'iz vajah se ) qatl Karo to Khoobi ke Saath qatl Karo aur Jab ( Jaanwar ko ) Zibah Karo to Khoobi ke Saath zibah Karo aur ( Khoobi ki ek Soorat ye Hai k ) Zibah karne Wala Apni Chhuri tez Kar le aur Jaanwar ko Araam pahunchaye _,"

* Muslim - 2/152*

┱_ Ahsaane Husn se liya gaya Hai Jiska Tarjuma humne " Khoobi Ka Bartaav karna" Kiya Hai, Momin ko chahiye k Jisse bhi uska waasta pade ( insaan ho ya Jaanwar ) usse Khoobi Ka Bartaav aur Achchha sulook Kare , Khoobi Ka qaa'ida muqarrar nahi Jo Bayan kar Diya Jaye ,Ye to har Shakhs ki khud Apni basirat per Hai k har moqe aur har maamle mai ye gor kare k is Waqt mere liye Khoobi ke bartaav Ka Kya moqa Hai ? Jab Zibah aur qatl mai bhi Khoobi ke bartaav ki zarurat Hai to Jinse Rozana waasta Padta Hai Unke Saath Khoobi Ka Bartaav karna kis qadar zaruri hoga ,

┱_ Zibah karne mai Khoobi Ka Bartaav zikr karne ke silsile mai Huzoor Aqdas Sallallahu Alaihivasallam ne ek juzvi misaal bhi zikr farmayi Hai aur Wo ye K Khoti ( Bhoti ya Kam dhaar wali ) Chhuri se Zibah na Kare aur Chhuri ko Zibah se pehle tez Kar le , Aur ye bhi farmaya k Jaanwar ko Araam pahunchaye Jiski Bahut si Soorte hai'n Maslan - Thanda hone se pehle uski khaal na kheenche aur Koi uzv na kaate ,Bhooka Pyaasa rakh Kar Zibah na Kare, is silsile mai Fuqha ne likha hai k ek Jaanwar ko doosre Jaanwar ke saamne Zibah na Kare aur Chhuri ko uske saamne tez na Kare ,

┱_ Ek Shakhs ek Bakri Ka Kaan pakad Kar kheench Kar le ja raha Tha ,Use dekh Kar Aap Sallallahu Alaihivasallam ne farmaya k iska Kaan Chhod de aur gardan pakad kar le ja _," *( Ibne Maaja)*

"__ Doodh Dohne mai Khoobi Ka Bartaav ye Hai k Nakhoon bade hue na ho Taki thano ko takleef na pahunche , Sawari ki Khoobi Ka Bartaav ye Hai k Jaanwar ko khamo khwah na daudaye ,Us per chade chade baate na Kare ,Manzil per pahunch kar uski chaare Paani ki fikr Kare aur uska Kajawa Kaathi Jeen utaar kar doosre Kaam mai lage ,vagera vagera ,

╨───────────────────── 
*┱✿ Chhoto Per Raham Karne Aur Bado Ka Ikraam Karne Ki Ahmiyat_,*

┱ _ Hazrat Ibne Abbaas Raziyallahu Anhu se Rivayat Hai k Huzoor Aqdas Sallallahu Alaihivasallam ne irshad farmaya k Woh Shakhs humme se nahi Hai Jo Hamare Chhoto per Raham na Kare aur Hamare Bado ki toqeer na Kare aur Amr bil Ma'aroof na Kare aur Nahi Anil Munkir na Kare _,"

* Mishkaatul Masabeh-423 Ba hawala Tirmizi,*

┱_ Hadeese Paak mai Chaar Cheezo ki badi Ahmiyat ke Saath takeed farmayi - Chhoto per Raham Karna, Bado Ka I karna ,Amr bil Ma'aroof aur Nahi Anil Munkir karna( Bhalaai Ka Hukm karna aur Buri Baato se Mana karna ) ,aur farmaya k Jo Shakhs in cheezo per Amal na kare wo humme se yani Musalmano ki Jama'at mai se nahi Hai ,

┱_ Budho Ka ikraam ke bare mai Huzoor Aqdas Sallallahu Alaihivasallam ne irshad farmaya Hai k Jis kisi Jawan ne Kisi Budhe Ka ikraam uske Budhape ki vajah se Kiya to Allah Ta'ala uske Budhape ke Waqt ese Aadmi ko muqarrar farmayega Jo uska ikraam Karega , *( Tirmizi )*

┱_ Chhote Bachche bhi Rahmat ke mustahiq hai'n, Apne Bachche ho ya kisi doosre ke, Huzoor Sallallahu Alaihivasallam Chhote Bachcho se Bahut Shafqat Ka Bartaav farmate they ,Bachcho ko goad mai lete ,Pyaar karte aur Choomte bhi they ,

"_ Hazrat Ayesha Raziyallahu Anha farmati hai'n k Huzoor Aqdas Sallallahu Alaihivasallam ke paas ( logo ke ) Bachche laye Jate they, Aap Sallallahu Alaihivasallam Unke liye Barkat ki Dua dete they aur Unki tahneek farmate they ( Yani Apne moonh mai khajoor chaba kar Bachche ke moonh mai daal dete they fir taalu se mal dete they)  ," *( Muslim )*

┱ _ _' Ek martaba Hazrat Umme Qais Raziyallahu Anha Apne ek doodh pite Bachche ko Aap Sallallahu Alaihivasallam ki khidmat mai le kar aayi , Aap Sallallahu Alaihivasallam ne usko Apni goad mai bitha liya , Bachche ne Aap Sallallahu Alaihivasallam ke Kapdo per Peshaab Kar diya, Aap Sallallahu Alaihivasallam ne Khud hi usko Paak farmaya _," *( Mishkaat )*

┱_ Ek martaba Hazrat Anas Raziyallahu Anhu Ka chhota Bhai Aap Sallallahu Alaihivasallam ki khidmat mai laya gaya, Aap Sallallahu Alaihivasallam ne us Bachche se farmaya - Ey Abu Umer Tumhari Wo Chidiya Kya Hui ? Us Bachche ke paas ek Chidiya thi Jisse Khelta Tha ,Wo Mar gayi to Aap Sallallahu Alaihivasallam ne esa farmaya -," *( Bukhari v Muslim )*

┱_ Hazrat Bara'a Raziyallahu Anhu farmate hai'n k Mai'ne Aap Sallallahu Alaihivasallam ko dekha ( Aapke Nawaase ) Hasan bin Ali Raziyallahu Anhu Aapke Kaandhe per they ,Us Waqt Aap Sallallahu Alaihivasallam ye Dua farma rahe they- Ey Allah ! Mai'n isse Muhabbat karta hu'n Aap bhi isse Muhabbat farmaiye _," *( Bukhari)*

┱_ Hazrat Anas Raziyallahu Anhu farmate hai'n k Maine Kisi ko nahi dekha Jo Huzoor Aqdas Sallallahu Alaihivasallam se badh kar Apne Ghar walo per Meharbaan ho ,

"__ Yaha'n ye nukta qabile gor Hai k Huzoor Aqdas Sallallahu Alaihivasallam ne Avval Chhoto per Raham Karne Ka zikr farmaya, uske baad Bado ke ikraam Ka tazkira farmaya , is tarteeb mai Goya is taraf ishara Hai k Bado ko Chhoto per Shafqat aur Raham Ka Khayal rakhna tarteeb ke aitbaar se muqaddam Hai ,Yani Jab Chhoto per Raham hoga to wo bhi Bado Ka ikraam karenge ,aur Jab ye Chhote bade ho jayenge to Jo Apne bado se Shafqat Ka Bartaav seekha Hai usko Apne Chhoto per istemal karenge ,Bahut se Log Chhoto Per Shafqat to karte nahi aur Unse Ikraam ki Ummeed rakhte hai'n ,Ye Unki nadaani Hai ,Halanki Chhoto ko ye nahi Dekhna chahiye k Bado ne hamare Saath kesa Bartaav Kiya? Apna Deeni fariza bado Ka ikraam karna Hai, unka Amal Unke Saath Hai, hamara Amal hamare Saath, 

╨───────────────────── 
*┱✿ Bewao'n aur Yateemo aur Miskeeno per Raham Khane aur Unki Khidmat Karne Ka Sawab_,*

┱ _ Hazrat Abu Huraira Raziyallahu Anhu se Rivayat Hai k Farmaya Rasulullah Sallallahu Alaihivasallam ne k Musalmano mai Sabse behtar Ghar wo hai Jisme Koi Yateem ho aur Uske Saath Achchha sulook Kiya Jata ho aur Musalmano mai badtareen Ghar wo hai Jisme Koi Yateem ho aur Uske Saath bura Bartaav Kiya Jata ho _,"

* Mishkaatul Masabeh - 423 Ba hawala ibne Maaja,*

┱_ Hazrat Abu Huraira Raziyallahu Anhu se Rivayat Hai k Huzoor Akram Sallallahu Alaihivasallam ne irshad farmaya k Bewao'n aur Miskeeno ke liye Maal kamane Wala esa Hai Jese Koi Shakhs Fi Sabilillaah Yani Jihaad mai Mehnat aur Mashaqqat ke Saath laga hua ho ,

"__ Raavi kehte hai'n k Mujhe Yaad Padta Hai k ( iske Saath ) ye bhi farmaya k us Shakhs ki misaal Esi Hai Jese Koi Shakhs ( Raato Raat Namaz mai )  khada rahe ,Jisme Susti na kare aur Jese Koi Shakhs ( Lagataar ) Roze rakha Kare aur darmiyan mai Be -Roza na rahe _,"

* Mishkaat- 422 Ba hawala Bukhari v Muslim*

┱ _ Hazrat Abu Umama Raziyallahu Anhu se Rivayat Hai k Huzoor Aqdas Sallallahu Alaihivasallam ne farmaya k Jisne Kisi Yateem Ke Sar per Haath fera aur Ye Kaam Sirf Allah ke Liye Kiya to uske Liye har Baal ke badle mai Jis per uska haath guzrega Chand Nekiya'n milegi aur Jisne Kisi Yateem Bachchi Ya Bachche ke Saath Achchha sulook Kiya Jo uske Paas rehta ho to Mai'n aur Wo Jannat mai is tarah se honge  Lafz " is tarah se " farmate hue Aap Sallallahu Alaihivasallam ne Apni dono ungliya'n ( Beech wali aur Shahadat ki Ungli ) Mila li _,"

* Ahmad v Tirmizi ,*

┱_ Hazrat Auf bin Maalik Raziyallahu Anhu se Rivayat Hai k Huzoor Akram Sallallahu Alaihivasallam ne irshad farmaya k Mai'n aur Wo Aurat Jiske rukhsaaro per syaahi aa gayi ho Qayamat ke din in dono ungliyo'n ( Yani beech ki Ungli aur uske paas wali Shahadat ki Ungli) Ki Tarah ( qareeb qareeb ) honge ,

__ Fir us Aurat ki sift batate hue irshad farmaya k Siyaah Rukhsaro wali Aurat se wo Aurat muraad Hai Jo Sahibe Haisiyat aur Khoobsurat thi ,Apne Shohar se Bewa ho gayi aur usne Apne Yateem Bachcho ki Parwarish ke liye Apne Nafs ko ( Doosra Nikaah karne se ) roke rakha , Yaha'n Tak k Wo Bachche bade ho Kar usse Juda ho gaye ( Yani Khidmat ke mohtaaj na rahe ) Ya Wafaat pa gaye _,"

* Abu Daowd _,*

┱_ Hazrat Abdullah bin Umar Raziyallahu Anhu se Rivayat Hai k Huzoor Aqdas Sallallahu Alaihivasallam ne irshad farmaya k Raham Karne walo per Rahmaan Raham karta Hai, Tum un per Raham Karo Jo Zameen per hai'n ,Wo Raham Farmayega Jo Asmaan mai ( Azeem v Kareem ) Hai _,"

* Abu Daowd _,*

┱_ Hazrat Anas Raziyallahu Anhu se Rivayat Hai k Huzoor Aqdas Sallallahu Alaihivasallam ne irshad farmaya k Saari Makhlooq Allah Ta'ala Ka Kunba Hai ( Yani Allah ke Aal Aulaad ,Bivi Bachche to hai'n nahi wo Tane Tanha Hai aur Yakta Hai ,Uska kisi se Koi Rishta aur Naata nahi ,Uski Makhlooq hi uska Kunba Hai )  Pas Allah ko Sabse zyada Pyaara wo Hai Jo uske Kunbe ke Saath Achchha Bartaav Kare __,"

* Mishkaat _,*

"__ in Saare mazmoon mai jo Waaqa'i Miskeen hai'n unka zikr Hai ,Peshawar maangte firte hai'n Amuman Maaldaar Hote hai'n yaha'n unka zikr nahi Hai aur Miskeeno ko qareeb karne aur Unke paas bethne Ka ye matlab nahi k Parde Ka Hukm khatm Kar de ,Balki Mard un Mardo ki khabar le Jo Miskeen ho aur Aurte'n Miskeen Aurto'n ki khidmat Kare ,

╨───────────────────── 
*┱✿ Walden Ke Saath Husne Sulook Umar Daraazi aur Wusate Rizq Ka Sabab Hai_,*

┱ _ Hazrat Anas Raziyallahu Anhu se Rivayat Hai k Huzoor Aqdas Sallallahu Alaihivasallam ne irshad farmaya k Jisko ye pasand ho k Allah Ta'ala uski Umr Daraazi Kare aur Uska Rizq badhaye Usko Chahiye k Apne Maa'n Baap Ke Saath Husne Sulook kare aur Doosre Rishtedaro ke Saath Silah Rahmi kare _,"

* Durre Mansoor -173 Ba hawala Bayhiqi ,*

┱_ Hazrat Abu Umama Raziyallahu Anhu se Rivayat Hai k Ek Shakhs ne arz Kiya- Ya Rasulallah Sallallahu Alaihivasallam Walden Ka Aulaad per Kya Haq Hai ? Aap Sallallahu Alaihivasallam ne iske Jawab mai farmaya k Wo dono Teri Jannat aur Teri Jahannam hai'n _,"

* Mishkaatul Masabeh-421 Ba hawala ibne Maaja,*

┱_ Wo dono Teri Jannat hai'n aur Teri Jahannam hai'n Yani Unki Khidmat karo aur Unke Saath Husne Sulook se yeah aate raho aur Unki farmabardari mai lage raho ,Tumhara ye Amal Jannat mai Jane Ka Sabab banega ,aur Agar Tumne unko sataya , Takleefe di , Na-Farmani ki to Tumhara ye Amal Dozakh mai le Jane Ka Sabab banega,

┱_ isse samajh Lena chahiye k Unka Haq kis qadar Hai aur Unke Saath kis tarah Zindgi guzaarna chahiye,

╨───────────────────── 
*┱✿ Walden Ke Saath Husne Sulook Ka Kya Martaba Hai ?*

┱ _ Hazrat Abdullah ibne Masoud Raziyallahu Anhu ne Bayan farmaya k maine Nabi Kareem Sallallahu Alaihivasallam se daryaft Kiya k Sab kaamo mai Allah Jal Shanhu ko konsa Kaam zyada Pyaara Hai ?
Aap Sallallahu Alaihivasallam ne farmaya - bar Waqt Namaz padhna ( Jo uska Waqt mustahab ho ) ,

Maine arz Kiya- iske baad konsa Amal Allah ko Sab A'amaal se zyada Mehboob hai ?
Aap Sallallahu Alaihivasallam ne farmaya - Maa'n Baap Ke Saath Husne Sulook Ka Bartaav karna,

Maine arz Kiya k iske baad Konsa Amal Allah Ta'ala ko Sab A'amaal se zyada Pyaara Hai?
Aap Sallallahu Alaihivasallam ne farmaya- Allah ki Raah mai Jihaad karna ,

( Sawal v Jawab Naqal Kar ke ) Hazrat Abdullah ibne Masoud Raziyallahu Anhu ne farmaya k ( Mere Sawalaat ke Jawabaat mai ) Huzoor Aqdas Sallallahu Alaihivasallam ne mujhse ye baate Bayan farmayi aur agar Mai'n aur zyada daryaft karta to Aap Sallallahu Alaihivasallam barabar jawab dete rehte _,"

* Mishkaatul Masabeh - 58 Ba hawala Bukhari v Muslim,*

┱_ Hadees Sharif mai irshad farmaya k Allah Ta'ala ke nazdeek Sabse zyada Mehboob Amal Waqt per Namaz Ada Karna aur uske baad Sabse Zyada Mehboob Amal Maa'n Baap ke Husne Sulook karna aur uske baad Jihaad fisabilillah , maloom hua k Maa'n Baap ki khidmat karna Jihaad Fisabilillah se bhi badh kar Hai ,*

╨───────────────────── 
*┱✿ Husne Sulook mai Maa'n Ka Zyada Khayal Rakha Jaye _,*

┱ _ Hazrat Abu Huraira Raziyallahu Anhu se Rivayat Hai k Ek Shakhs ne Huzoor Aqdas Sallallahu Alaihivasallam se daryaft Kiya k ( Rishtedaro mai ) mere Husne Sulook Ka Sabse Zyada mustahiq Kon Hai ? Iske Jawab mai Huzoor Sarware Do Aalam Sallallahu Alaihivasallam ne farmaya k Tumhari Walida Husne Sulook ki zyada mustahiq Hai,

Saa'il ne poochha - Fir Kon ? Aap Sallallahu Alaihivasallam ne farmaya - Tumhari Walida ,

Usne daryaft Kiya- fir Kon ? Aap Sallallahu Alaihivasallam ne farmaya Tumhari Walida ,

Sawal karne wale ne arz Kiya- Fir Kon ? Farmaya- Tumhara Baap ,

┱_ Aur Ek Rivayat mai Hai k Aap Sallallahu Alaihivasallam ne Walida ke bare mai Teen baar farmaya k Tere Husne Sulook ki Sabse Zyada mustahiq Hai , Fir Baap Ka zikr farmaya k Wo Maa'n ke Baad Husne Sulook Ka Sabse Zyada mustahiq Hai, Fir farmaya k Baap ke baad Rishtedaro mai Sabse Zyada qareeb tar ho uske Saath Husne Sulook Karo ,aur us qareeb tar rishte wale ke Baad jo rishte mai Sabse Zyada qareeb tar ho uske Saath Husne Sulook Karo_,"

* Mishkaatul Masabeh- 418 Ba hawala Bukhari v Muslim,*

┱_ Fazaile Sadqaat mai Hai k is Hadees Sharif mai Baaz Ulma ne istanbaat kiya Hai k Husne Sulook aur Ahsaan mai Maa'n Ka Haq teen hisse Hai aur Baap Ka ek hissa , isliye k Huzoor Aqdas Sallallahu Alaihivasallam ne Teen martaba Maa'n ko bata Kar Chothi martaba Baap ko bataya , iski vajah Ulma ne ye bataya k Aulaad Ke Maa'n Teen mashakkate bardasht karti Hai - 1_ Hamal ki ,2_Janne Ki ,3_Doodh pilane ki ,

┱_ isi vajah ne Fuqha ne tashreeh ki Hai k Ahsaan v Sulook mai Maa'n Ka Haq Baap per muqaddam Hai ,Agar Koi Shakhs Esa ho k Wo Apni nadaari ki vajah se dono ke Saath Sulook nahi Kar Sakta to Maa'n ke Saath Sulook karna muqaam Hai ,Albatta aizaaz aur Adab v tazeem mai Baap Ka Haq Maa'n per muqaddam Hai,

╨───────────────────── 
*┱✿ Maa'n Baap Ko Sataane Ka Gunaah aur Duniya mai Vabaal _,,*

┱ _ Hazrat Abu Bakar Raziyallahu Anhu se Rivayat Hai k Huzoor Aqdas Sallallahu Alaihivasallam ne irshad farmaya k Maa'n Baap Ke Sataane ke alawa Tamaam Gunaah ese hai'n Jinme se Allah Ta'ala Shanhu Jisko chahte hai'n maaf farma dete hai'n aur Maa'n Baap Ko Sataane ka gunaah esa hai K us gunaah ke karne wale ko Allah Jal Shanhu Maut se pehle Duniya wali hi Zindgi mai saza de dete hai'n _,"

* Mishkaat - 421 Ba hawala Bayhiqi Fi Shoebul imaan ,*

┱_ Ek Hadees Paak mai irshad Hai k Zulm aur Qata Rehmi Ke alawa Koi Gunaah esa nahi Hai Jiska irtkaab karne Wala Duniya mai saza pane Ka zyada mustahiq ho , in dono Gunaaho ke murtakib ko Duniya mai saza de di jati hai ( Lekin isse Aakhirat ki saza khatm nahi ho jati balki ) uske Liye Aakhirat ki saza bhi bator zakhira rakh li jati hai ( Jab Aakhirat mai Pahunchega To Waha'n Saza Payega ) _,"

* Mishkaat _,*

"_ Maloom hua k Maa'n Baap ko Sataane ki saza Duniya v Aakhirat dono Jaha'n mai milti Hai ,

┱_Hazrat Abdullah bin Umar Raziyallahu Anhu se Rivayat Hai k Huzoor Aqdas Sallallahu Alaihivasallam ne irshad farmaya k Bade Bade Gunaah ye hai'n -( 1)- Allah Ta'ala ke Saath Shirk karna ,( 2)- Walden Ke Saath Nafarmani Karna ,(3) -Kisi Jaan ko qatl kar dena ( Jiska qatl karna Qatil ke liye Halaal na ho ),( 4 ) - Jhooti qasam Khana _,"

* Mishkaat Ba hawala Bukhari,*

"__Kabeera Gunaaho ki fehrist Bahut Lambi Hai ,is Hadees mai Sirf un Gunaaho Ka zikr Hai Jo Bahut bade hai'n ,inme Shirk ke Baad Walden ki nafarmani air iza rasaai ko zikr farmaya,

╨───────────────────── 

*┱✿ Jo Badla Utaar de Wo Silah Rahmi Karne Wala nahi _,*

┱ _ Hazrat ibne Umar Raziyallahu Anhu se Rivayat Hai k Huzoor Aqdas Sallallahu Alaihivasallam ne irshad farmaya k Jo Shakhs Badla Utaar de Wo Silah Rahmi Karne Wala nahi Hai balki Silah Rahmi Karne Wala wo Hai k jab usse Qata Rehmi Ka Bartaav Kiya Jaye to Wo Silah Rahmi Ka Bartaav Kare _,"

*🗂 Mishkaatul Masabeh- 419 Ba hawala Bukhari _,*

┱_ Hazrat Uqba bin Aamir Raziyallahu Anhu ne Bayan farmaya k Huzoor Aqdas Sallallahu Alaihivasallam se meri mulaqaat Hui to Maine Jaldi se Aap Sallallahu Alaihivasallam Ka Daste Mubarak pakad liya aur Aap Sallallahu Alaihivasallam ne ( bhi ) Jaldi se mera haath pakad liya ,fir farmaya k ,

"__ Ey Uqba ! Kya Mai'n tujhe Duniya aur Akhirat walo ke Afzal Akhlaaq na bataau'n ? 

Fir khud hi farmaya k - Jo Shakhs tujhse Qata Talluq kare to usse Talaaq Jode rakh aur Jo tujhe mehroom kar de Tu usko diya kar aur Jo Shakhs tujh per Zulm Kare usko maaf Kar diya Kar _,"

Fir farmaya k - Khabardaar ! Jo ye Chahe k uski Umar Daraaz ho aur Rizq mai wus'at ho usko chahiye k Apne Rishtedaro se Silah Rahmi Ka Bartaav Kare _,"

*🗂 Muatadrak Haakim - 4/162*

╨───────────────────── 

*┱✿ Qata Rehmi Ka Vabaal _,*

┱ _ Hazrat Abdullah bin Abi Avfa Raziyallahu Anhu Ka Bayan Hai k Maine Huzoor Aqdas Sallallahu Alaihivasallam ko farmate hue Suna Hai k us qaum per Rehmat naazil nahi hoti Jisme Koi Shakhs Qata Rehmi karne Wala mojood ho _,"

*🗂 Ravaah Bayhiqi Fi Shoebul imaan,*

┱_ Hazrat Abu Huraira Raziyallahu Anhu se Rivayat Hai k Huzoor Aqdas Sallallahu Alaihivasallam ne irshad farmaya k Lafze " Raham " liya gaya Hai Lafze " Rahmaan " se ( Jo Allah Jal Shanhu Ka naam Hai ) ,

Pas Allah Jal Shanhu ne farmaya k ( Ey Raham !) Jisne tujhe Jode rakha ( Yani Tere huqooq Ada kiye ) Mai'n usko Rehmat ke Saath Apne se mila lunga aur Jisne tujhe kaat diya usko ( Apni Rehmat se ) kaat dunga ( Yani Rehmat ke daayre se Alag Kar dunga ) _,"

*🗂 Mishkaatul Masabeh- 419 Ba hawala Bukhari,*

┱_ maloom hua k Qata Rehmi ki saza Duniya v Aakhirat dono mai bhigatni padti hai , Bahut se khandaano mai barso guzar Jate hai'n aur Aapas ke Talluqaat theek nahi Hote , Aapas mai qatl v Khoon Tak ho Jate hai'n aur muqadma baazi to Rozana Ka Mashgala ban Jata Hai ,Bhai Bhai Kachehriyo'n mai Dushmano ki tarah khade rehte Hai'n ,Lad rahe hai'n Mar rahe hai'n ,na Salam Hai na Kalaam Hai , Aamna saamna hota Hai to ek doosre se moonh fer lete hai'n , bhala in cheezo Ka islam mai Kaha'n guzar hai ? 

┱_ Agar Islam ki Talimaat ko Apna kar  Silah Rahmi ke usool per chale to khandaano ki ladaai foran khatm ho Jaye , Jo log Qata Rehmi ko Apna lete hai'n Unki aane wali naslo ko bhi iske nateeje bhigatne padte hai'n , 

              

╨───────────────────── 

*┱✿ Aapas mai Doosre Ki Madad Karne ki Ahmiyat _,*

┱ _ Hazrat Nomaan bin Basheer Raziyallahu Anhu se Rivayat Hai k Huzoor Aqdas Sallallahu Alaihivasallam ne irshad farmaya k Tum imaan walo ko Aapas mai Reham karne aur Muhabbat v Shafqat rakhne mai ek Jism ki tarah dekhoge ( Yani Wo is tarah honge Jese ek hi Jism hota Hai ) k jab ek uzv ko takleef hoti Hai to Saara Jism be Khwabi aur bukhaar ko bula Leta Hai _,"

*🗂 Mishkaatul Masabeh-422 Ba hawala Bukhari v Muslim,*

┱_ Ek aur Hadees mai Hai k Aap Sallallahu Alaihivasallam ne irshad farmaya k Saare Musalman ek Shakhs ki tarah hai'n agar Aankh mai takleef hoti Hai to Saare Jism ko Takleef hoti Hai aur agar Sar mai takleef hoti Hai to Saare Jism ko takleef hoti Hai ,

*🗂 Muslim _,*

┱_ Hazrat Abu Moosa Ash'ari Raziyallahu Anhu farmate hai'n k Rasoole Khuda Sallallahu Alaihivasallam ne irshad farmaya k Ek Momin doosre Momin ke liye Misl ek imaarat ke hai k imaarat ke ajza ( iynt ,Patthar ,Choona vagera ) ek doosre ko mazboot rakhte hai'n, fir Aap Sallallahu Alaihivasallam ne ungliyo'n mai ungliya'n daali ( aur ek doosre Ka madadgaar hone ki Soorat batayi ) _,"

*🗂 Bukhari v Muslim _,*

┱ _ * Ab Zara Apni haalat per gor kijiye aur is Zamane ke Musalman kehlane wali qaum Ka haal Dekhiye k Apne Matlab ke liye Musalman ko har Mumkin Soorat se nuqsaan pahunchane ke liye taiyaar hai'n , Pareshan haal ki madad aur khabargeeri to door ki Baat Hai ,uske paas se guzarna aur usko taslli dena bhi bhaari lagta hai, Apne Matlab ke liye Duniya ko Bhai bana lenge aur Jaha'n doosre Bhai Ka Koi Kaam atka , Masla pesh aaya to foran Rishta tod daala ,

┱_ Hazrat Anas Raziyallahu Anhu farmate hai'n k Rasoole Khuda Sallallahu Alaihivasallam ne irshad farmaya k Jisne mere kisi Ummati ki haajat poori kar di Taki usko khush kare to usne mujhe Khush Kiya aur Jisne mujhe Khush Kiya usne Khuda ko Khush Kiya aur Jisne Khuda ko Khush Kiya Khuda usko Jannat mai dakhil Farmayega _," 

*🗂 Bayhiqi _,*

┱_ Ek Hadees mai Hai k Rasoole Khuda Sallallahu Alaihivasallam ne irshad farmaya k Jisne Kisi Pareshan haal ki madad ki Khuda uske liye Tehattar ( 73 ) magfirate likh dega , Unme se ek mai uske Sab Kaam ban jayenge aur Behattar ( 72 ) Qayamat ke Din uske darje Buland karne ke liye hongi _,"

*🗂 Bayhiqi _,*

╨───────────────────── 

*┱✿ Musalman Ko nuqsaan Pahunchana Aur Dhoka dena Laanat Ka Sabab Hai_,*

┱ _ Hazrat Abu Bakar Siddiq Raziyallahu Anhu se Rivayat Hai k Huzoor Aqdas Sallallahu Alaihivasallam ne irshad farmaya k Wo Shakhs mal'oun hai Jo Kisi Momin Ko Zarar ( Takleef ) Pahunchaye ya uske Saath makr ( Dhoka ) kare _,"

*🗂 Mishkaatul Masabeh--428 Ba hawala Tirmizi,*

┱_ Hazrat Abu Huraira Raziyallahu Anhu ne bayan farmaya k Ek martaba kuchh log bethe hue they , Huzoor Aqdas Sallallahu Alaihivasallam tashreef laye aur Waha'n khade ho gaye aur farmaya :-

"__ Kya Mai'n tumko ye na bataau'n k tumme Achchha Kon hai ? Aur Bura Kon hai ? 

Ye sun Kar haazireen khamosh ho gaye , Aap Sallallahu Alaihivasallam ne teen baar yahi Sawal farmaya to ek Shakhs ne arz Kiya- Ya Rasulallah Sallallahu Alaihivasallam zaroor bataiye k humme bura Kon hai aur Achchha Kon hai ? 

Aap Sallallahu Alaihivasallam ne farmaya- tumme Sabse Behtar Wo hai Jisse Khayr ki Ummeed ki jati ho aur Uske Shar ki jaanib se itminaan ho ,( Yani log is Baat Ka Yaqeen rakhte ho k is Shakhs se kisi tarah Ka nuqsaan nahi Pahunchega ) aur ( farmaya ) k tumme badtareen Aadmi Wo hai Jisse Khayr ki Ummeed na ki jati ho aur Jiske Shar se log be Khof na ho _,"

*🗂 Tirmizi , Bayhiqi _,*

┱_ Momin Ka Kaam ye Hai k Saari Ko nafa pahunchaye aur Khaas Kar Momin Bando ki har tarah se Khayr Khwahi Kare ,unko nafa pahunchaye aur takleef se bachaye ,Dukh dard mai Kaam aaye , aur is tarah se Zindgi guzaare k Aas Pados ke log aur har Wo Shakhs Jisse Koi bhi waasta ho Apne Dil se ye Yaqeen Kare k ye Musalman Aadmi hai , Saari Duniya mujhe nuqsaan pahuncha sakti Hai Lekin isse mujhe Koi takleef nahi pahunch sakti Kyunki ye Musalman Hai ,

┱ _ __ Hazrat Abu Huraira Raziyallahu Anhu se Rivayat Hai k Huzoor Aqdas Sallallahu Alaihivasallam ne irshad farmaya k Musalman Wo hai Jiski Zubaan se aur Haath se Musalman salamat rahe ( Yani unko Koi Dukh takleef uski taraf se na pahunche ) aur Momin Wo hai Jiski taraf se Logo ko Apne Khoono aur maalo per itminaan ho k is Shakhs se koi jaani Maali nuqsaan na Pahunchega _,"

*🗂 Tirmizi , Nasa'i _,*

┱_ Dekhiye Huzoor Aqdas Sallallahu Alaihivasallam ne Baat Kehne Ka kesa andaz Akhtyar farmaya ,ye farmane ki bajaye k logo ko takleef mat pahunchao ,yu'n farmaya k Apni Zindgi Ka dhang aur logo ke Saath Bartaav Ka esa Tor Tareeqa rakho k Unke Dilo mai ye baat beth Jaye k Saari Duniya Hume nuqsaan pahuncha sakti Hai Lekin isse Hume nuqsaan nahi pahunch Sakta ,

┱_ Hadees mai Momin ke Saath Makro fareb Dhoka karne ki bhi Sakht mazammat farmayi ,ye Momin Ka Kaam nahi Hai aur Momin ke Saath Makro fareb Dhoka karna aur Dhoka dena Bahut Sakht Vabaal ki Cheez Hai , Bahut se log hamdard ban Kar andar andar jad kaat te hai'n ,zaahir mai Dost aur Baatin mai Dushman Hote hai'n ,Baaz makkaari ke Saath Esi Baat kehte hai'n Jisme uska nuqsaan hota Hai ya takleef pahunchti Hai , aur usko ye zaahir karte hai'n k hum to bhale ke liye Keh rahe hai'n , hamdardi Kar rahe hai'n , Sidha Saada Musalman ese makkaro ki baat Ka aitbaar Kar ke Dhoka kha Kar nuqsaan uthata Hai , isme Jhoot aur Khayanat dono jama ho Jate hai'n ,

"__ farmaya k ye badi Khayanat Hai k tu Apne Bhai ko Koi esi Baat kare Jisme tu jhoota ho aur Wo tujhe sachcha Jaan raha ho _ ," *( Abu Daowd )*

┱_ Jo Shakhs Momin ke Saath Makro fareb Kare Huzoor Sallallahu Alaihivasallam ne usko bhi mal'oun qaraar diya, 

╨───────────────────── 

*┱✿ Padosiyo'n Ke Huqooq aur Unke Saath Husne Sulook_,*

┱ _ Hazrat Abu Huraira Raziyallahu Anhu se Rivayat Hai k Ek Shakhs ne arz Kiya k Ya Rasulallah Sallallahu Alaihivasallam ! bila shuba Fala Aurat Esi Hai k Uski Namaz aur Roza aur Sadqa ki Kasrat Ka ( Logo mai ) tazkira rehta Hai ,Lekin uske Saath ye Baat bhi hai k Woh Apne Padosiyo'n ko Apni Zubaan se iyza deti Hai ,

Ye Sun Kar Huzoor Aqdas Sallallahu Alaihivasallam ne farmaya k ye Aurat Dozakh mai Hai ,

Fir us Shakhs ne arz Kiya k Ya Rasulallah Sallallahu Alaihivasallam ! Beshak Fala Aurat ke bare mai logo mai ye tazkira rehta Hai k ( Nifl ) Roze aur ( Nifl ) Sadqa aur ( Nifl ) Namaz Kam Ada karti Hai aur Paneer ke kuchh tukde Sadqa de deti Hai aur Apne Padosiyo'n ko Apni Zubaan se iyza nahi deti , 

Ye Sun Kar Aap Sallallahu Alaihivasallam ne farmaya k Wo Jannat mai Jane Wali Hai _,"

*🗂 Mishkaatul Masabeh - 425 Ba hawala Ahmad v Bayhiqi,*

┱_ Padosiyo'n Ke Saath achche mamlaat ke Saath Zindgi guzaarne ki Shari'ate islamiya mai bahut zyada targeeb di gayi hai , usse Jo Takleef pahunche us per Sabr Kare ,aur Apni taraf se usko kisi qism ki Koi takleef na pahunchaye aur uski mushkilaat v masa'ib mai Kaam aaye , Jaha'n Tak Mumkin ho uski Madad kare , Uske Ghar ke saamne Kuda kachra na daale ,Uske Bachcho ke Saath Shafqat v Muhabbat Ka Bartaav Kare , 

┱_ in Baato Ka likh Dena ,Bol Dena aur Sun Lena to Asaan Hai Lekin Amal karne ke liye badi himmat aur Hosle ki zarurat Hai , Agar Kisi tarah Ka Koi Achchha Sulook Kar sake to Kam se Kam itna zaroor Kare k usko Koi takleef na pahunchaye aur aage pichhe uski khair Khwahi kare, 

┱_ Huzoor Aqdas Sallallahu Alaihivasallam ne irshad farmaya k Jibraiyl Alaihivasallam mujhe barabar Padosi ke Saath husne Sulook karne ki wasiyat karte rahe yaha'n Tak k maine ye gumaan Kiya k Aap Padosi ko Waaris bana Kar chhodenge ,"

*🗂 Bukhari v Muslim ,*

┱ _Padosiyo'n ko takleef Pahunchana to Kya uske Saath is tarah Zindgi guzaare k usko kisi qism Ka Koi khatra aur khatka is Baat Ka na ho k Fala Padosi se mujhe takleef pahunchegi,

┱_ Ek martaba Huzoor Aqdas Sallallahu Alaihivasallam ne farmaya- Allah ki qasam Wo Momin nahi ,Allah ki qasam Wo Momin nahi,Allah ki qasam Wo Momin nahi, Arz Kiya gaya -Ya Rasulullah Sallallahu Alaihivasallam kiske bare mai irshad farma rahe hai'n ? Farmaya- Jiska Padosi uski Shararato se bekhof na ho _," *( Muslim )*

"__ Aur Ek aur Rivayat mai Yu'n Hai k Aap Sallallahu Alaihivasallam ne irshad farmaya k Wo Shakhs Jannat mai dakhil na hoga Jiska Padosi uski Shararato se bekhof na ho _," *( Muslim )*

┱_ Hazrat Abdullah bin Masoud Raziyallahu Anhu se Rivayat Hai k Ek Shakhs ne Huzoor Aqdas Sallallahu Alaihivasallam se arz Kiya k Ya Rasulallah Sallallahu Alaihivasallam ! Mai'n Apne bare mai kese janu k Mai'n Achchha hu'n ya Bura hu'n ? Huzoor Aqdas Sallallahu Alaihivasallam ne farmaya- Jab Tu Apne Padosiyo'n se sune k Woh Tere bare mai ye Keh rahe hai'n k Tu Achchhe Kaam karne Wala hai ,to Tu Achchha Hai aur Jab Tu sune k Woh Tere bare mai ye Keh rahe hai'n k Tu Bure Kaam karne Wala Hai to Tu bura Hai _," *( Ibne Maaja )*

┱_ Ek Roz Hazrat Ayesha Raziyallahu Anha ne aata pees Kar Chhoti Chhoti Rotiya'n pakayi , iske Baad Unki Aankh lag gayi , isi beech padosan ki Bakri aayi aur Wo Rotiya'n Khaa gayi , Aankh khulne per Hazrat Ayesha Raziyallahu Anha uske pichhe daudi , Ye dekh Kar Huzoor Aqdas Sallallahu Alaihivasallam ne farmaya k Ey Ayesha hamsaye ko uski Bakri ke bare mai na sataao _," (Al adab Al mazarrad )

┱_Hazrat ibne Abbaas Raziyallahu Anhu ne farmaya k Maine Huzoor Aqdas Sallallahu Alaihivasallam se Suna Hai k Wo Shakhs Momin nahi hai Jo Pet bhar le aur Uska Padosi uski bagal mai Bhooka ho _," *( Bayhiqi)*

┱_ in Sab Hadeeso se maloom hota Hai k Padosi per kisi tarah se koi zulm v zyadti bilkul hi na Kare aur Jaha'n Tak Mumkin ho uski khidmat v dildaari Kare , 

╨───────────────────── 

*┱✿ Jab Koi Shakhs Mashwara Talab Kare To Sahi Mashwara de _,*

┱ _ Hazrat Abu Huraira Raziyallahu Anhu se Rivayat Hai k Huzoor Aqdas Sallallahu Alaihivasallam ne irshad farmaya k Jisse Mashwara Talab Kiya Jaye wo Amanatdaar hota Hai _,"

*🗂 Ravaah Tirmizi ,*

┱_ Hadees mai ek Aham Ki Nasihat farmayi aur Wo ye k Jisse Mashwara Talab Kiya Jaye uski zimmedari hai k Sahi Mashwara de Jo uske nazdeek Durust ho aur Jisme Mashwara lene wale ki khair Khwahi ho , Jisse Mashwara Talab Kiya Jaye usko Huzoor Aqdas Sallallahu Alaihivasallam ne Amanatdaar qaraar diya Hai, Agar usne Koi esa Mashwara de diya Jisme Mashwara lene wale ki behtari na thi to Apne Bhai ki Khayanat ki ,

┱_ Lihaza agar Koi Shakhs Mashwara le to usko Wo Mashwara do jo Tumhare nazdeek uske Haq mai Behtar ho , Agarche isme Tumhara nuqsaan hi Kyu na hota ho , Maslan Tumhara Koi Padosi Makaan bechna chahta Hai aur Tumhare Dil mai ye Hai k ye Makaan farokht ho to hum le le , Lekin agar Wo Tumse Mashwara Talab Kare aur Tumhare nazdeek uske Haq mai jaydaad farokht karna Na-Pasand ho to usko yahi Mashwara do k farokht na Karo ,

╨───────────────────── 

*┱✿ Hanste Muskurate Mulaqaat Karna Bhi Neki mai Shamil Hai _,*

┱ _ Hazrat Abuzar Raziyallahu Anhu se Rivayat Hai k Huzoor Aqdas Sallallahu Alaihivasallam ne irshad farmaya k Hargiz kisi Zara si Neki ko bhi Haqeer na jano ( Jo kuchh Mumkin ho Neki karte raho ) Agarche yahi Kar Sako k Apne Bhai se Khilte hue Chehre se mil lo _,"

*🗂 Mishkaatul Masabeh- 167 Ba hawala Muslim ,*

┱_ Hadees mai Awwal to ye farmaya gaya Hai k Kisi bhi Neki ko Haqeer na jano ,Kitni hi Chhoti neki ho haath se na Jane do , Qayamat ke Din Chhoti se Chhoti neki bhi Bahut bada Kaam de jayegi , Ek Neki se bhi A'amaal Ka palda bhaari ho Kar Nijaat Ka zariya ho Sakta Hai, 

┱_ Fir bator ek Esi Neki Ka zikr farmaya Hai Jisme kharch kuchh nahi hota aur sawab khoob mil Jata hai aur Wo ye k Kisi Musalman se mulaqaat Karo to Hans Mukh Chehre se bashashat ke Saath Milo , Uska Dil Khush hoga aur Tumko khoob sawab mil jayega ,

┱_ Bahut se logo ko Mard ho ya Aurat Apni Deendari ya Maaldaari Ka ghamand hota Hai ,Jab koi salaam karta Hai to sidhe moonh usko salam Ka jawab Tak nahi dete , Jab koi Milne ko aaya to na usse achchi tarah Baat ki na bashashat se mulaqaat ki aur is tarah pesh aaye k Jese un per Gussa sawar Hai , moonh fulaye hue aur Ajeeb berukhi aur rookhepan se pesh aa rahe hai'n, Ye islam Ka Tareeqa nahi Hai ,

"_ Albatta Aurte'n Na-Mehramo se mulaqaat na Kare aur Parde ke pichhe se Sirf ba-qadre zarurat jawab de ,Jo Aurte'n Ghar Milne aaye Ghar ki Aurte'n unhe Ahatraam se bithaye ,Unke paas bethe ,Achchi tarah se bole ,Muskurakar Baat kare aur Unki Dildaari Kare ,Magar Geebat aur Badgoi se Bache ,Ye na dekhe Wo humse Maali v Duniyavi haisiyat mai Kam Hai ,  balki Unke Musalman hone ko dekhe , Unke paas bethne aur Dil Khush karne ke liye Nifl Namaz chhodni pade to wo bhi Chhod de , 

╨───────────────────── 

*┱✿ Raaste se Takleef Dene wali Cheez Hata Dene Ka Sawab _,*

┱ _ Hazrat Abu Huraira Raziyallahu Anhu se Rivayat Hai k Huzoor Aqdas Sallallahu Alaihivasallam se Maine ye arz Kiya-Ey Allah Ke Nabi Mujhe Koi Cheez Bata dijiye Jis per Amal Kar ke nafa haasil karu'n ,

Aap  Sallallahu Alaihivasallam ne irshad farmaya k Musalmano ke Raaste se Takleef Dene wali Cheez hata diya Karo _,"

*🗂 Mishkaatul Masabeh - 168 Ba hawala Muslim ,*

┱_ Hadeese Paak se is Amal ki fazilat maloom Hui k Raasto mai Jo Koi takleef dene wali Cheez padi mil Jaye Jisse Paanv fisal Jaye ,Thokar lag Jaye , Raasta Tang ho Jane ya kaanta vagera chubh Jane Ka Andesha ho , us Cheez ko hata Diya Jaye ,

┱_ Hazrat Abu Huraira Raziyallahu Anhu Ka Bayan Hai k Rasulullah Sallallahu Alaihivasallam ne ek Shakhs Ka zikr farmaya k uska ek darakht ki tehni per guzar hua Jo Raaste mai padi thi ,ye dekh Kar usne kaha k Mai'n isko Musalman ke Raaste se zaroor hata dunga ( Chunache usko hata di ) Lihaza Wo Jannat mai dakhil Kar diya gaya , *( Mishkaat )*

┱_ Hazrat Abuzar Raziyallahu Anhu farmate hai'n k Rasoole Khuda Sallallahu Alaihivasallam ne irshad farmaya k Musalman ke saamne Tumhara Muskurana sadqa hai aur Bhalaai Ka Hukm karna Sadqa hai aur Kamzor binaai wale ki madad karna Sadqa hai aur Raaste se Patthar ,Kaanta ,Haddi door Kar dena Sadqa hai aur Apne Dol se Bhaai ke Dol mai Paani daal dena Sadqa hai _," 

*🗂 Tirmizi ,*

*"__ Jab Raaste se Takleef Dene wali Cheez hata dene Ka ye ajro sawab hai to iske bar aks Raaste mai takleef dene wali Cheez ko daalne Ka Kya Vabaal hoga ? Is per gor karna chahiye , Bahut se log Apna Ghar to Saaf Kar lete hai'n Lekin Ghar Ka kooda karkat ,kachra ,gandgi Sade hue phal aur Badbudaar saalan vagera Raaste mai faink dete hai'n Jisse aane Jane walo ko shadeed takleef hoti Hai, Raaste mai takleef dene wali Cheez Hargiz na daale aur Esi Koi Cheez Raaste mai padi mile Jisse Takleef pahunch sakti ho to use hata kar sawab kamaye,

╨───────────────────── 

*┱✿ Parda Poshi Ka Ajro Sawab_,*

┱ _ Hazrat Uqba bin Aamir Raziyallahu Anhu se Rivayat Hai k Huzoor Aqdas Sallallahu Alaihivasallam ne irshad farmaya k Jisne Kisi ki Koi ayb ki Baat dekhi usko chhupa liya ( To Sawab ke aitbaar se ) Wo Shakhs esa hai Jese kisi zinda dafan ki Hui Ladki ko zinda Kar diya _,"

*🗂 Mishkaatul Masabeh - 424 Ba hawala Tirmizi,*

┱_ Is Hadees Mubarak mai Parda Poshi Ka Sawab bataya Hai , is sawab ko is andaza mai batane mai ek baareek Hikmat ki taraf ishara Hai k Jab kisi Shakhs Ka Koi ayb zaahir ho jata Hai to wo Apni is ruswaai ke muqable mai mar Jana behtar samajhta Hai, Pas Jis Shakhs ne uske ayb ki Parda Poshi ki goya usne usko zinda Kar diya, Ruswaai se bachana usko dobara zindgi dene ke barabar qaraar diya gaya , 

┱_ Hazrat Abdullah bin Umar Raziyallahu Anhu se Rivayat Hai k Huzoor Aqdas Sallallahu Alaihivasallam ne irshad farmaya k Musalman Musalman Ka Bhaai hai ,na us per Zulm Kare ,na usko ( musibat ke Waqt ) be yaaro madadgaar chhode , aur Jo Shakhs Apne Bhaai ki haajat mai laga rehta Hai Allah Ta'ala uski Haajat rawaai farmayenge aur Jisne Kisi Musalman ki becheni door ki Allah Ta'ala Qayamat ke Din ki Pareshaniyo mai se uski ek Pareshani door farmayenge aur Jisne Kisi Musalman ki Parda Poshi ki Qayamat ke Din Allah Ta'ala uski Parda Poshi farmayenge _,"

*🗂 Bukhari v Muslim ,*

┱_ Bahut se logo ko ye marz hota Hai k doosre ke aybo ke pichhe pade rehte Hai'n, fir jab kisi Ka Koi ayb maloom ho jata Hai to usko uchhalte hai'n aur Ruswa karne ko bada Kamaal samajhte hai'n, Ye Sakht Gunaah ki Baat hai aur iska bada Vabaal Hai , farmaya gaya k ," _Jo Kisi Musalman Bhai ke ayb ke pichhe pade Allah uske ayb ke pichhe padega aur Allah Jiske ayb ke pichhe pade usko Ruswa Karega Agarche Wo Apne Ghar mai ayb Ka Kaam Kare , *( Mishkaat )*

╨───────────────────── 

*┱✿ Aapas mai Sulah Kara dene Ka Sawab _,*

┱ _ Hazrat Abu Darda Raziyallahu Anhu bayan farmate hai'n k Ek martaba Huzoor Aqdas Sallallahu Alaihivasallam ne irshad farmaya -"_ Kya Mai'n tumko Wo Cheez na bataau'n Jo ( nifli ) rozo aur Sadqa aur Namaz ke darje se Afzal Hai ,"

Humne arz Kiya zaroor irshad farmaye'n ,

Aap Sallallahu Alaihivasallam ne farmaya k Ye Cheez Aapas mai bigaad ki islaah Kar dena Hai aur Aapas Ka bigaad moond dene wali Cheez Hai _,"

*🗂 Mishkaatul Masabeh-428 Ba hawala Abu Daowd v Tirmizi,*

┱_ Ek Saath rehne walo mai kabhi kabhi ranjish ho jati hai aur us Ranjish ko Jaldi hi door na Kiya Jaye to badhte badhte Bahut Door Tak pahunch jati hai aur Bugz Dilo mai jagah pakad Leta Hai aur do Aadmiyo ki Ranjish kabhi kabhi Poore khandano ko lapet leti Hai ,isliye Jaldi se Jaldi Sulah ki taraf mutavajjah hona Laazim Hai, zyada achchhi aur Sidhi Baat to ye Hai k Har Aadmi ek doosre se jaa Kar khud mil le aur Salaam Kar le , isme pahal karne wale Ka martaba zyada Hai ,

┱_ Hadees Paak mai Aapas ke bigaad ko door karne aur Sulah karane ki itni badi fazilat batayi k is Amal Ka darja nifli ibaadat se bhi badh kar Hai , Aapas mai bigaad door Karna itni aham Cheez Hai k  iske liye Shari'at ne Jhoot jesi Cheez Ka Sahara lene ki bhi ijazat di Hai , Farmaya k Wo jhoota nahi Jo logo ke darmiyan ( Jhoot bol kar ) Sulah karata Hai aur achchhi Baat ko Kehta Hai aur achchhi Baat ko ( kisi Fareeq Tak ) pahunchata Hai , *( Bukhari v Muslim )*

╨───────────────────── 

*┱✿ Musalman Ki Mizaaj Pursi Karne Ki Fazilat _,*

┱ _ Hazrat Anas Raziyallahu Anhu se Rivayat Hai k Huzoor Aqdas Sallallahu Alaihivasallam ne irshad farmaya k Jo Shakhs Wazu kare aur Achchhi tarah Wazu Kare aur  Sawab Samajh kar Musalman Bhaai ki iyaadat kare to Jahannam se itna door Kar diya jayega Jitni door Koi Saath ( 60 ) chal kar pahunche _,"

*🗂 Abu Daowd _,*

┱_ Hazrat Abu Huraira Raziyallahu Anhu Rivayat farmate hai'n k Rasoole Khuda Sallallahu Alaihivasallam ne irshad farmaya k Jo Shakhs Kisi Mareez ki iyaadat karta Hai to Asmaan se ek munaadi ye Nida deta Hai k Tu Khush rahe aur Tera ye chalna Ba-Barkat ho aur tune Jannat mai ghar bana liya _,"

*🗂 Ibne Maaja _,*

┱_ Ek aur Hadees mai Hai k Jo Musalman kisi Musalman ki Subeh ko iyaadat kare to tamaam din Shaam Tak Sattar ( 70 ) Hazaar Farishte us per Rehmat bhejte rehte Hai'n aur agar Shaam ko Musalman ki iyaadat kare to Subeh hone Tak Sattar (70) Hazaar Farishte us per Rehmat bhejte rehte Hai'n aur Uske liye ( is Amal ki vajah se ) Jannat mai ek Baag hoga _,"

*🗂 Tirmizi v Abu Daowd ,*

┱_ Hazrat Abu Saied Raziyallahu Anhu se Rivayat Hai k Jab Tum Kisi Mareez ke paas jao to uski Zindgi baqi rehne ke bare mai Ummeed dilao ( Yani usse Esi baate kare k usko Achchha Hone ki Ummeed rahe, uske saamne Na ummeedi ki baate na kare ) Kyunki ye cheeze ( Allah ki Taqdeer mai se ) kisi ko hata to nahi sakti Albatta usse Mareez Ka Dil Khush ho jayega _,"

*🗂 Tirmizi v ibne Maaja ,*

  

╨───────────────────── 

*┱✿ Narmi Akhtyar Karne Per Allah Ta'ala Ka in'aam_,*

┱ _ Hazrat Ayesha Raziyallahu Anha se rivayat Hai k Huzoor Aqdas Sallallahu Alaihivasallam ne irshad farmaya k bila shuba Allah Ta'ala Meharbaan Hai aur Meharbani ko pasand farmata Hai,Aur Meharbani per woh ( Ni'amate ) ata farmata Hai Jo Sakhti per aur Uske alawa Kisi per ata nahi farmata _,"

*🗂 Mishkaatul Masabeh- 431 Ba hawala Muslim ,*

┱_ Hazrat Jareer Raziyallahu Anhu se Rivayat Hai k Huzoor Aqdas Sallallahu Alaihivasallam ne irshad farmaya Jo Shakhs Narmi se Mehroom Kar diya gaya Wo Bhalaai se mehroom kar diya Jata hai _,"

*🗂 Mishkaatul Masabeh- 431 Ba hawala Muslim ,*

┱_ Ek Hadees mai K Huzoor Aqdas Sallallahu Alaihivasallam ne irshad farmaya Jis Shakhs ko Narmi se hissa de diya gaya use Duniya v Aakhirat ki Bhalaai Ka hissa mil gaya aur Jo Shakhs Narmi ke hisse se mehroom kar diya gaya Wo Duniya v Aakhirat ki Bhalaai ke hisse se mehroom kar diya gaya _,"

*🗂 Mishkaat ,*

╨───────────────────── 

*┱✿ Gusse se Parhez Karne Ki Takeed _,*

┱ _ Hazrat Abu Huraira Raziyallahu Anhu farmate hai'n k Huzoor Aqdas Sallallahu Alaihivasallam se ek Shakhs ne darkhwaast ki k Mujhe Wasiyat farmaiye ? Aap Sallallahu Alaihivasallam ne farmaya - Gussa na Kiya kar ,

Usne fir yahi arz Kiya k Mujhe kuchh wasiyat farmaiye ? Aap Sallallahu Alaihivasallam ne fir Wahi jawab diya ,

Usne fir Wahi arz Kiya, Aap Sallallahu Alaihivasallam ne fir Wahi jawab diya, ( garz k ) us Shakhs ne Chand baar Wahi Sawal kiya aur Aap Sallallahu Alaihivasallam ne har baar Wahi jawab inayat farmate rahe k Gussa na kiya kar _,"

*🗂 Mishkaatul Masabeh- 433 Ba hawala Bukhari,*

┱_ Baaz rivayaat mai Yu'n Hai k Ek Shakhs Rasulullah Sallallahu Alaihivasallam ki khidmat mai haazir hua aur usne arz Kiya- Ya Rasulallah mujhe Bata dijiye Jis per Amal karu Magar zyada na ho ,Shayad Mai'n use girah baandh lu , Rasulullah Sallallahu Alaihivasallam ne iske jawab mai farmaya - Gussa na kiya Karo , usne fir Wahi Baat Kahi ,Aap Sallallahu Alaihivasallam ne fir Wahi jawab diya,garz k Chand baar isi tarah Sawal v jawab hua ,

┱_ Doosri Rivayat mai Hai k Saa'il ne yu'n kaha Tha - Ya Rasulallah Sallallahu Alaihivasallam mujhe ek esa Amal bata dijiye Jiske zariye Jannat mai dakhil ho jaau'n Lekin zyada na bataiye ,Aap Sallallahu Alaihivasallam ne farmaya Gussa na kiya Karo ,

┱_ in Ahadees se maloom hua k Huzoor Aqdas Sallallahu Alaihivasallam ne Saa'il ko Esi Cheez batayi thi Jis per Amal karne se bahut si buraiyo'n se bacha ja sakta Hai aur Bahut si bhalaaiyo Ka zariya ban Sakta Hai ,

╨───────────────────── 

*┱✿ Gussa Pine Ki Fazilat _,*

┱ _ Bayhiqi ki ek Rivayat mai Hai k Huzoor Aqdas Sallallahu Alaihivasallam ne farmaya k Jo Shakhs Apne Gusse ko rok Leta Hai, Khuda qayamat ke Roz usse Apne azaab ko rok lega ,

┱ _ Aur Hazrat Abdullah bin Umar Raziyallahu Anhu Rivayat farmate hai'n k Rasulullah Sallallahu Alaihivasallam ne farmaya k Raza ke liye Gusse Ka ghoont pi Jane se badh kar Allah Ta'ala ke nazdeek kisi ghoont Ka Pina Afzal nahi Hai _,"

*🗂 Mishkaat _,*

╨───────────────────── 

*┱✿ Takabbur Ka Azaab v Vabaal Kya Hai ?,*

┱ _ Hazrat Abdullah bin Masoud Raziyallahu Anhu se Rivayat Hai k Huzoor Aqdas Sallallahu Alaihivasallam ne irshad farmaya k Wo Jannat mai dakhil na hoga Jiske Dil mai Ek zarra ke barabar bhi Takabbur ho, 

Ye Sun kar ek Shakhs ne arz Kiya k Koi Shakhs ye pasand Karta hai k Uska Kapda Achchha ho aur uska Joota Achchha ho , ( To Kya ye Takabbur Hai ? )

Huzoor Aqdas Sallallahu Alaihivasallam ne jawab mai farmaya k bila shuba Allah Ta'ala Jameel Hai Jamaal ko Pasand Karta Hai , ( Achchha Kapda aur Achchha Joota Pehanna Takabbur nahi Hai balki ) Takabbur ye Hai k Haq ko Thukraye aur Logo ko Haqeer Samjhe _,"

*🗂 Mishkaatul Masabeh- 433 Ba hawala Muslim,*

┱_ Guroor v Ghamand v Shekhi ,Khud Pasandi ye Sab Takabbur ki shaakhe hai'n , Jin logo mai Takabbur hota Hai bas Wo Sirf Apne hi Khayal mai bade Hote hai'n aur Logo ke Dilo mai Unki Zara bhi izzat nahi hoti ,aur Jo log Tawazo akhtyar karte hai'n Yani logo se esa Maamla karte hai'n k Apni badaai Ka Zara bhi Khayal nahi hota ,Wo logo ke nazdeek Mehboob Hote hai'n,

┱_ ( Pichhe Part se Jaari ) _, Hazrat Umar Raziyallahu Anhu ne ek martaba minbar per irshad farmaya k Ey logo ! Tawazo akhtyar Karo , Kyunki Maine Rasulullah Sallallahu Alaihivasallam se Suna Hai k Jo Shakhs Allah ke Tawazo akhtyar kare ,Allah usko Buland farma dega Jiska Nateeja ye hoga k Wo Apne Nafs mai chhota hoga aur Logo ki Aankho mai bada hoga ,

Aur Jo Shakhs Takabbur akhtyar Karega Allah usko gira dega Jiska Nateeja ye hoga k Wo logo ki Aankho mai chhota hoga aur Apne Nafs mai bada hoga, ( Logo ke nazdeek uski Zillat Ka ye Aalam hoga k ) Wo usko Kutte aur Suwar se badh kar Zaleel janenge _,"

*🗂 Mishkaatul Masabeh-,*

┱_ Ek Hadees mai irshad Hai k Takabbur karne wale logo Ka qayamat ke din is tarah Hashr hoga k Wo insaani shaklo mai chyuntiyo'n ki barabar Chhote Chhote jismo mai honge , un per har tarah se Zillat chhayi Hui hogi , Wo Jahannam ke Jail Khane ki taraf hanka kar le jayenge , is Jail Khane Ka Naam " بولس " Hai , in logo per Aago ko jalane wali Aag chadhi hogi aur in logo ko dozakhiyo ke jismo Ka nichod ( peep vagera ) pilaya jayega , Jisko " Taynatul Khabaal " Kehte hai'n _,"

*🗂 Tirmizi ,*

┱_ Logo ko Haqeer samjhne wale mutakabbir to Bahut hai'n Lekin Jo log Haq ko Thukrate hai'n Unki bhi kami nahi Hai , Baaz martaba kisi be Namazi se kaha Jata hai k Namaz padh , to Kehta Hai k Kon uthak Patak Kare , aur Tum Jannat mai chale Jana hum Dozakh mai chale jayenge , aur Jab kabhi kisi be rozedaar se Roze rakhne ko kaha Jata hai to jawab deta Hai k Roza Wo rakhe Jiske Ghar khaane ko na ho , Aur Jab kaha Jata hai k Shaadi Byaah mai Sunnat Tareeqa akhtyar Karo to kehte hai'n k Hum Koi gareeb hai'n Kya Jo Sunnat per chale ? ,Ye Sab baate Haq ko thukrane ki hai'n ,aur Kufriya baate hai'n ,inse imaan Jata rehta Hai , 

*"_Bhai ,Maa'n, Behno Tum Tawazo akhtyar Karo , Takabbur se bacho ,Apne Bachcho ko bhi isi Raah per daalo ,kisi ko Haqeer na jano aur Deen ki har Baat ko sachche Dil se qubool Karo ,Haq ko thukra kar Apni Duniya v Aakhirat kharab na Karo ,*

╨───────────────────── 

*┱✿ Tawazo Ka Hukm aur Ek Doosre ke Muqable mai Fakhr Karne Ki Muma'anat,*

┱ _ Hazrat Ayaaz bin Hamaar Raziyallahu Anhu se Rivayat Hai k Huzoor Aqdas Sallallahu Alaihivasallam ne irshad farmaya k Allah Ta'ala ne Meri taraf Wahi bheji Hai k Tum log Tawazo akhtyar Karo, Yaha Tak k Koi Shakhs Kisi Ke muqable mai Fakhr na Kare aur Koi Shakhs kisi per zyadti na kare _,"

*🗂 Mishkaatul Masabeh- 417 Ba hawala Muslim,*

┱_ Hadees Paak mai irshad farmaya k Allah Ta'ala ne Tawazo akhtyar karne Ka hukm farmaya Hai, Guroor shekhi ,Fakhr , Ghamand Sabko ek taraf daalo aur Tawazo akhtyar Karo, Koi Shakhs kisi Ke muqable mai Fakhr na Kare aur Koi kisi per zyadti na kare, Apne Ohde mansab martaba aur Maal Jaaydaad aur Hukumat per Fakhr karna aur Doosre ko Haqeer ghatiya chhota jaanna gunaah Hai , Maal Daulat ke alawa Apne nasab khandaan per Fakhr karna bhi Sakht Mana Hai , Nasbi Sharafat Allah ki ek Ni'amat Hai Lekin doosre ko Haqeer Samjhne ki ijazat nahi Hai, Akhirat mai Taqwa aur A'amale Saliha per faisla hoga , Jiska Amal kotah ho usko aage nahi badhayega ,

╨───────────────────── 
*┱✿ Kisi Ka Mazaaq Udana aur Vaada Khilafi Karne Ki Muma'anat-,*

┱ _ Hazrat ibne Abbaas Raziyallahu Anhu se Rivayat Hai k Huzoor Aqdas Sallallahu Alaihivasallam ne farmaya k Tu Apne Bhai se Jhagda na Kar aur usse Mazaaq na kar aur usse Koi esa Vaada na Kar Jiski tu khilaf varzi kare _,"

*🗂 Mishkaatul Masabeh- 417 Ba hawala Tirmizi,*

┱_ Hadees Paak mai Chand nasihate farmayi hai'n , Avval ye k Apne Bhai se Jhagda na Kar , Jhagda Bahut Buri Cheez hai ,Apne Haq ke liye Agarche Jhagda Karna durust hai lekin jhagde Ka Chhod dena beharhaal A'ala aur Afzal Hai , Jhagda karne se gaali galoch aur bad kalaami ki nobat aa jati hai aur Dilo mai Keena jagah pakad Leta hai ,fir iske asraat v samraat Bahut Bure paida Hote hai'n ,

┱_ Farmaya Huzoor Aqdas Sallallahu Alaihivasallam ne k Jisne Galti per Hote hue Jhagda Chhod diya uske liye Jannat ke ibtidayi hisse mai Makaan banaya jayega aur Jisne Haq per Hote hue Jhagda Chhod diya uske liye Jannat ke darmiyani hisse mai Makaan banaya jayega aur Jisne Apne Akhlaaq Achchhe kiye uske liye Jannat ke ounche hisse mai Makaan banaya jayega _,"

*🗂 Mishkaat ,*

┱_ Doosri Nasihat farmayi k Musalman Bhai se mazaq na kar , Mazaaq ki do Soorte hai'n, ek ye k Dil Khush karna maqsood ho to Mazaaq Jaa'iz hai , balki mustahab hai , Basharte k Jhoot na ho Vaada Khilafi na ho , Doosri Soorat ye hai k Jisse Mazaaq Kiya Jaye usko nagwar ho ,esa Mazaaq Jaa'iz nahi Hai , aksar esa hota Hai k Chand Aurte'n mil Kar kisi Aurat se Mazaaq Shuru kar deti hai'n aur Jiska Mazaaq kar rahi hai'n usko bura lag raha hai ,Wo chid rahi hai aur Ulta sida Keh rahi Hai, isme Chunki iyza e Muslim hai Yani musalman  ko takleef Dena hai ,isliye ye Haraam Hai,

╨───────────────────── 
*┱✿ Vaada Khilafi Munafqat Hai ,*

┱ _Hadees Mai Teesri Nasihat farmayi k Apne Bhai se Vaada kar ke uski khilaf varzi na Kare , ye bhi bahut Aham Nasihat hai , Jisme Bahut se log kotahi baratte hai'n ,jab kisi se Vaada Kare to Vaada karne se pehle Apne Halaat aur Awqaat ke aitbaar se Khoob gor Kare k ye vaada mujhse poora ho sakega ya nahi ,agar poora Kar Sakta ho to Vaada Kare Varna ma'azrat kar de ,Jhoota Vaada Karna Haraam Hai,

┱_Hazrat Anas Raziyallahu Anhu ne Bayan farmaya k Bahut Kam esa hua hai k Huzoor Aqdas Sallallahu Alaihivasallam ne khutba Diya ho aur ye na farmaya ho k - Uska Koi imaan nahi ,Jo Amanatdaar nahi ,aur uska Koi Deen nahi Jo Ahad Ka poora nahi Hai _,"

*🗂 Mishkaatul Masabeh-15,*

┱_ Hazrat Abu Huraira Raziyallahu Anhu se Rivayat Hai k Huzoor Aqdas Sallallahu Alaihivasallam ne irshad farmaya k Munafiq ki teen nishaniya'n hai'n,Chahe Roza rakhe aur Namaz padhe aur Apne bare mai ye samjhe k Mai'n Musalman hu'n ,

1- Jab Baat Kare to Jhoot bole ,
2- Jab Vaada Kare to uske khilaf kare ,
3- Jab uske paas Amanat rakhi Jaye to Khayanat kare,

*🗂 Mishkaat Ba hawala Bukhari v Muslim,*

┱_ Aur Hazrat Abdullah bin Umar Raziyallahu Anhu se Rivayat Hai k Huzoor Aqdas Sallallahu Alaihivasallam ne irshad farmaya k Jis Shakhs mai ye Chaar Khaslate hongi Khaalis Munafiq hoga ,aur Jisme in me se ek khaslat hogi to usme nifaaq ki ek khaslat hogi jab tak usko Chhod na de ,
1- Jab uske paas Amanat rakhi Jaye to Khayanat kare,
2- Jab Baat kare to Jhoot bole,
3- Ahad kare to Dhoka kar de ,
4- Jhagda Kare to gaali bake ,

*🗂 Bukhari v Muslim ,*

*"__ isliye har Musalman Mard Aurat per ye Laazim Hai k Jhoote Vaade se ,bad Ahadi se Aur Vaada Khilafi se Khoob zyada Khayal Kar ke mehfooz rahe ,

╨───────────────────── 
*┱✿ Paisa Hote Hue Qarz Ada na Karna _,*

┱ _ Bahut se log Waqti zarurat ke liye dukaandaar se Sauda Udhaar le lete hai'n ya Kisi se Naqad Raqam le lete hai'n , Baad mai qarz dene wale ko satate hai'n , Vaade per Vaada kiye Jate hai'n Lekin qarz ki adaygi nahi karte ,

┱_ Doosre Ka Maal bhi le liya aur Usko Vaada Khilafi ke zariye iyza bhi de rahe hai'n , aur Taqaazo ki vajah se aane Jane se uska Waqt bhi barbaad karte hai'n , har Shakhs ko ye sochna chahiye k Mai'n iski jagah hota to Mai'n Apne Liye Kya pasand Karta ? Jo Apne Liye Pasand Kare Wahi doosre ke liye pasand Karna Laazim Hai ,

┱_ Jis Shakhs ke paas adaygi ke liye Maal mojood na ho wo qarzkhwah se ma'azrat kar le aur Mohlat maange aur us Tareekh per adaygi Ka Vaada Kare Jis Waqt Paisa paas hone Ka gaalib gumaan ho , Aur Juske paas Maal mojood ho foran qarzkhwah Ka Haq Ada kar de , bilkul taal matol na kare ,

┱_ Huzoor Aqdas Sallallahu Alaihivasallam Ka irshad hai :- Jiske Paas adaygi ke liye Maal mojood Ho uska Taal matol Karna Zulm hai _," *( Mishkaatul Masabeh )* Hadees mai un logo ke liye Khaas tambeeh hai Jo adaygi Ka intezam hote hue bhi Sahibe Haq ko Aaj Kal per Taalte rehte Hai'n , Aur Jhoote Vaade Karte rehte Hai'n, ese Jhoote Vaade karne wale ko Huzoor Sallallahu Alaihivasallam ne Zaalim qaraar diya Hai ,

╨───────────────────── 
*┱✿ Musalman Bhai Ki Musibat Per Khush hone Ki Mum'anat ,*

┱ _ Hazrat Waasila Raziyallahu Anhu se Rivayat Hai k Huzoor Aqdas Sallallahu Alaihivasallam ne irshad farmaya k Apne Bhai ki musibat per Khushi zaahir na Kar ( Mumkin hai ) iske baad Allah us per Raham farma de aur tujhe ( Musibat mai ) mubtila farma de _,"

*🗂 Mishkaatul Masabeh- 414 Ba hawala Tirmizi ,*

┱_ Is Hadees mai ek Aham majmoon irshad farmaya hai aur Wo ye k jab kisi Musalman ko Mard ho ya Aurat kisi tarah Ka Dukh takleef ya nuqsaan v khasara vagera mai mubtila dekho to us per kabhi Khushi Ka izhaar mat Karo Kyunki ye Koi zaruri nahi k tum Hamesha musibat se mehfooz reh jao ,

┱_ Ye bhi Mumkin Hai k Jiski Musibat per Khushi Ka izhaar kiya hai Allah Ta'ala usko musibat se Nijaat de de aur Tumko us musibat mai mubtila Kar de , aur ye Mahaz ek farzi Baat nahi Hai balki Umuman dekhne mai aata Hai Aur Aksar esa hota rehta Hai ,

┱_ Agar kisi Shakhs mai Koi ayb aur Buraai hai Deeni ya Duniyavi to us per Khush hona ya Taana ke tarz per usko zikr Karna aur bator aar aur ayb ke Saath usko Bayan Karna Mana hai , Haa'n agar ikhlaas ke Saath Nasihat ke Tor per khair Khwahi ke Saath Nasihat Kare to ye achchhi Cheez Hai Lekin Haq goyi Ka bahana kar ke taana Dena aur ayb lagana Durust nahi Hai , Mukhlis ki Baat hamdardana hoti Hai aur Nasihat Ka tarz aur hi hota Hai, Tanhaai mai samjhaya Jata hai ,Ruswa Karna maqsood nahi hota ,  Rasulullah Sallallahu Alaihivasallam ne farmaya k Jisne Apne Bhai ko kisi gunaah Ka ayb Lagaya to us Waqt Tak nahi marega jab tak us gunaah ko khud na Karega _," *( Tirmizi )*

╨───────────────────── 
*┱✿ Husne Akhlaaq Se Mutalliq Ek Jaam'a Hadees,*

┱ _ Hazrat Abu Huraira Raziyallahu Anhu se Rivayat Hai k Sarware Do Aalam Sallallahu Alaihivasallam ne irshad farmaya k Aapas mai Hasad na Karo aur Ek Doosre Ke bhaav per bhaav mat badao aur Aapas mai Bugz na rakho aur ek doosre se moonh na modo ,aur Ek Shakhs doosre ki bay'a per bay'a na Kare ,aur Allah ke bande Bhai Bhai ban Kar raho ,

___ ( Fir farmaya ) Musalman Musalman Ka Bhai hai , na us per Zulm Kare ,na usko bekasi ki haalat mai chhode ,na use Haqeer jane ( iske baad ) teen baar Apne Mubarak Seene ki taraf ishara karte hue irshad farmaya k Taqwa yaha'n hai , Yaha'n hai ,

__( Fir farmaya k) Insaan Ke bura hone ke liye yahi Kaafi hai k Apne Musalman Bhai ko Haqeer jane , Musalman ke liye Musalman Ka Sab kuchh Haraam hai , Uska Khoon bhi ,Maal bhi ,Aabru bhi _,"

*🗂 Sahih Muslim, 6/ 31 ,*
╨───────────────────── 
*┱✿ Hasad Ka Vabaal _,*

┱ _ Hasad badi Buri Bala hai ,Jo Haasid hoga lamuhala Apne Dilo dimaag Ka naas karke kahega , Qur'an Majeed mai Haasid ke Hasad se panaah maangne ki taleem di gayi hai - 
      ( وَمِن شَرِّ حَاسِدٍ إِذَا حَسَدَ)

┱_ Ek Hadees mai Hai k Sarware Do Aalam Sallallahu Alaihivasallam ne irshad farmaya k Hasad se bacho , Kyunki Woh Nekiyo'n ko is tarah Khaa Jata hai Jese Lakdiyo ko aag Khaa jati hai _," *( Mishkaat )*

┱_ Ulma Kiraam ne farmaya k Hasad Haraam hai ,Hasad ke Haraam hone ki ek Sabse Badi vajah ye Hai k Jisko Allah Ta'ala ne Jo kuchh diya Hai Hikmat ke bager nahi diya hai , Ab Jo Hasad karne Wala ye chahta Hai k ye Ni'amat Fala Shakhs ke paas na rahe ,to dar haqeeqat ye Allah per aitraaz hai k usne isko Kyu nawaza ? Aur Hikmat ke khilaf isko doosre haal mai Kyu na rakha ? Zaahir hai makhlooq ko Khaaliq ke Kaam mai dakhal dene Ka kuchh Haq nahi Hai,

┱_ Jab kisi ko Hasad ho jata Hai to Jisse Hasad karta Hai usko nuqsaan pahunchane ki koshish karta Hai ,Uski Geebat karta Hai aur usko jaani Maali nuqsaan pahunchane ki fikr mai rehta Hai ,Jiski vajah se bade bade Gunaaho mai ghir Jata hai, Fir ese Shakhs ko Avval to Neki karne Ka moqa hi nahi milta aur agar Koi Neki karta bhi hai to ye akhirat mai usko milegi Jisse ye Hasad Kiya Hai ,to Neki Karna na Karna bekaar ho gaya ,

"__ irshad farmaya Nabi Kareem Sallallahu Alaihivasallam ne k Pehli ummato Ka marz yahi Hasad tum Tak aa pahuncha hai aur Bugz to moond dene Wala Hai , Mai'n nahi Kehta k Wo Baalo ko moondta hai balki Deen ko moond deta Hai ," *( Mishkaat )*
              
▦══─────────────══▦
ReF✿┅╮    

         * Tohfa E Khawateen,*
                  ╨───────────────────── 
              

Tohfa e Khawateen TaLaaq



          .           ﺑِﺴْــــــــــــــــﻢِﷲِﺍﻟﺮَّﺣْﻤٰﻦِﺍلرَّﺣِﻴﻢ

    .   鹿 *TOHFA-E-KHAWATEEN* 鹿         
                  ✰﹏﹏﹏﹏﹏﹏✰       
                *⊙_ T A L A A Q_ ⊙*

╨───────────────────── 
*┱✿ Bila Vajah Talaaq Ka Sawal Uthane Wali Per Jannat Haraam Hai_,*

┱ Hazrat Sobaan Raziyallahu Anhu se rivayat Hai k Hazrat Rasoole Kareem Sallallahu Alaihivasallam ne irshad farmaya k Jo Aurat bager kisi majboori ke Apne Shohar se Talaaq Ka Sawal kare us per Jannat ki khushbu Haraam Hai _,"

* Mishkaatul Masabeh-283, Ba hawala Tirmizi vagera ,*

*┱✿ Khul'a Ka Mutalba Karne Wali Aurte'n Munafiq Hai'n_,*

┱  Hazrat Abu Huraira Raziyallahu Anhu se rivayat Hai k Sarkare do Jaha'n Sallallahu Alaihivasallam ne irshad farmaya k Shoharo se alhaidgi ( Alag hona ) chahne wali aur Khul'a Ka Mutalba Karne Wali Aurte'n nifaaq Wali Aurte'n hai'n _,"

* Mishkaatul Masabeh- 282 Ba- Hawala Nasa'i,*

┱ Allah Ta'ala ne Mardo ko Aurto'n ki taraf aur Aurto'n ko Mardo ki taraf mohtaaj banaya Hai , Fitri Tor per Shadi Byaah Karne per Majboor hai'n , Shari'at ne insaan ke Fitri taqazo ko pamaal nahi kiya balki Unki ri'ayat rakhi Hai , islam ne Zina ko haraam qaraar diya Hai isliye Nikaah Karna Shar'an Mahmood aur Mustahsin hi nahi balki Baaz halaat mai Waajib Hai ,

┱ Bahut si Aurte'n mizaaj ki tez hoti hai'n ,wo Baat Baat per Mard se ladti Hai , Jo huqooq Waajib nahi unka bhi Shohar se Mutalba karti hai'n , Shohar ki na-Shukri karti hai'n, Shohar Koi Baat kahe to Talaaq ki nobat aa jati hai, Aurto'n ke is mizaaj ke peshe Nazar Shari'at ne Aurat ki Talaaq dene Ka Akhtyar nahi diya , Varna ek ek din mai Kai Kai baar Talaaq Diya karti , Nikaah Talaaq dene ke liye nahi hota , Zindagi bhar Saath nibhane ke liye hota Hai , Mard agar Talaaq de de to Talaaq ho jati hai lekin Talaaq dena islam ke mizaaj ke khilaf Hai ,
              
╨───────────────────── 
*┱✿ Talaaq Bugz Ki Cheez Hai_,*

┱ Ek Hadees mai aaya Hai k "Halaal cheezo mai Allah Ta'ala ke nazdeek Sabse zyada Bugz aur Nafrat ki Cheez Talaaq Hai _," ( Abu Daowd ) ,Jab Nibhana islam Ka mizaaj thehra to Aurat ki taraf se Talaaq Ka Sawal Uthana sarasar gair islami fayl Hai , isliye ye irshad farmaya k Talaaq ya Khul'a Ka Mutalba Karne Wali Aurte'n Munafiq hai'n ,

┱ Islam ke taqazo per na chalna aur Islam Ka daava Karna ye dogle pan ki Baat Hai , Munafiq dogla hota Hai aur andar kuchh aur zaahir kuchh  karta Hai , aur Sabse bada Munafiq wo Hai Jo Dil se Munafiq ho aur Zubaan se islam Ka daava kare , Lekin Jo Shakhs islam daavedaar Hai aur Dil se bhi Deene islam ko Haq hone Ka Aqeeda rakhta Hai Lekin Amal mai imaani taqazo per poora nahi utarta use Amal ke aitbaar se Munafiq kaha gaya Hai ,

┱ Hadees Sharif mai Bahut si Khaslato ko munafqat ki khaslat batata Hai - Ek Hadees mai irshad Hai k Jisme Chaar Khaslate hongi wo Munafiq hoga aur Jisme in me se ek khaslat hogi to uske bare mai kaha jayega k usme Munafiq ki ek khaslat Hai Jab Tak use Chhod na de , Wo Chaar Khaslate ye hai'n :--

1- Jab Uske Paas Amanat rakhi Jaye to Khayanat kare ,
2- Jab Baat kare to Jhoot bole ,
3- Jab Ahad kare to uzr kare ( Yani vaada Kar ke poora na kare )
4- Jab Jhagda kare to Galtiya'n de ,

* Bukhari v Muslim _,*
              
╨───────────────────── 
*┱✿ Talaaq Zubaan se Nikalte hi Waq'a ho jati Hai_,*

┱ _ Talaaq ke Baad Jab Gussa thanda hota Hai to Pachhtate hai'n aur Kehte hai'n k maine Talaaq ki niyat se Talaaq nahi di aur Bahut zyada Gusse mai Tha ,Ya Aurat Hamal se thi ya uski Napaaki Ka zamana Tha ,aur Ye Baat isliye zikr karte hai'n k Unke nazdeek Gusse mai ya Haalate Hamal v haiz  mai Talaaq nahi hoti ,Halanki Talaaq Ka talluq Zubaan se Hai ,Jab Zubaan se Talaaq niklegi Waq'a ho jayegi ,

"__Shohar Gusse mai ho ya Razamandi mai aur Aurat Hamal se ho ya Napaaki ke ayaam mai ho ,Bahar haal Talaaq dene se Talaaq Waq'a ho jayegi ,

┱_ Talaaq wo Cheez Hai Jo Shohar ki Zubaan se Mazaaq mai bhi nikal Jane se bhi asar Kar jati hai, Huzoor Sallallahu Alaihivasallam Ka irshad Hai k ," Teen cheeze Esi hai'n Jinme Asal Niyat aur Mazaaq dono barabar hai'n, Yani bila Niyat ke mazaqan Zubaan se nikaalne se bhi Kaam Kar jati hai , - 1- Nikaah , 2- Talaaq, 3- Ruju Kar Lena ( Talaaq Raj'i ke Baad ) ,

* Abu Daowd ,*

┱ Jab Talaaq de bethe aur Aurte'n Shohar ko Gussa dila Kar Talaaq le bethti hai'n to Mufti ke paas Sawal le kar aate hai'n ,aur Kehte hai'n k Miya Bivi ek doosre per Aashiq hai'n ,Bivi khudkushi Kar legi , Bachche Veeraan honge ,Molvi Sahab Koi Raasta nikaliye , Bhala bechara Molvi Mufti ke bas mai nahi k Shari'at ke qanoon ko badal de , Mufti Molvi Shari'at ke qanoon batane wale hai'n, qanoon banane wale nahi ,Qanoon to Allah Ta'ala Ka Hai ,

╨───────────────────── 
          *┱✿ Ruju'i Talaaq _,*

┱ Aapas Ke Nibaah Ka Koi Raasta nahi raha aur Talaaq Deni hi ho to esa Kare k Jis Zamane mai Aurat Paak ho Yani Haiz se na ho us Zamane mai Ek Talaaq Saaf Lafzo mai de de ,is tarah se ek Ruju'i Talaaq ho jayegi ,Jiska matlab ye Hai k iddat ke andar andar Ruju karne Yani Lauta lene Ka Haq rehta Hai ,

┱ Ek Talaaq Ruju'i dene ke Baad Fir chahe to Ruju Kar le aur Ruju ke liye Aurat ki Razamandi bhi zaruri nahi Hai , Aurat chahe na chahe Mard Ruju Kar Sakta Hai , Zubaan se Sirf ye Keh dene se  k *"Maine Apni Bivi ko Lauta liya ,"* isse Ruju Sahi ho jata hai, Agar Do Gawaho ke saamne esa kahe to behtar Hai taki Ruju karne na karne ke bare mai ikhtilaf ho Jaye to Gawaho ke zariye Ruju Ka saboot Diya ja sake ,

"__ Agar Kisi ne Talaaq e Ruju'i ke baad iddat ke andar Koi esa Kaam Kar liya Jo Miya Bivi ke darmiyan hota Hai to is tarah bhi Ruju ho jayega , isko Ruju bil Fayl kehte hai'n aur Zubaan se Lauta lene ko Ruju bil qaul kehte hai'n ,

┱ Agar kisi ne Talaaq e Ruju'i dene ke Baad iddat ke andar Ruju nahi Kiya to yahi Ruju'i Talaaq Talaaq e Baa'in ho jayegi , Ab Ruju Ka Haq nahi rehta , Haa'n agar dono fir Miya Bivi banna chahte hai'n to Aapas ki Razamandi se dobara Nikaah Kar sakte hai'n,

"__ Chahiye to yahi k zarurat ke andar Sirf ek Talaaq se kaam chalaya Jaye ,Agar Talaaq ke Baad Pachhtawa ho to iddat ke andar Ruju karne Ka Haq baqi hone ki vajah se Shohar Ruju Kar sakega aur Agar Jaldi Hosh na aaya aur iddat guzar gayi to Aapas mai dobara Nikaah ho sakega ,

┱_ *Shari'at ki Asaani _,* _ Shari'at ne kitni Asaani rakhi Hai , Avval to Talaaq dene hi se Mana farmaya fir agar Talaaq dena zaruri ho to Aurat ki paaki ke Zamane mai Ek Talaaq de ,isse Gussa thanda hone aur sochne samajhne Ka khoob achchhi tarah moqa Mil Jata Hai ,Agar kisi ne Saaf Lafzo mai Ek Saath Do Talaaq de di to bhi Ruju'i hogi ,aur agar gair haamla Aurat ko paaki ke Zamane mai Ek Talaaq Saaf Lafzo mai di aur Ruju na kiya aur uske baad Jo paaki Ka zamana aaye usme ek Talaaq aur de di to wo Doosri Talaaq bhi Ruju'i hogi aur iska hukm bhi wo hoga Jo Pehli Talaaq Ka Tha ,

"__ Fir agar Teesri baar Teesri paaki ke Zamane mai Ek aur Talaaq de di to Talaaq e Muglazah hogi ,iddate Talaaq Teen Haiz Hai aur Haiz na aata ho ( Bachpan ya Budhape ki vajah se) to iddat Teen maah Hai aur Haamla ho to Hamal Khatm hone  per iddat Khatm hogi ,iddat ke andar andar Jo Talaaqe Shohar dega Waq'a hoti rehegi ,

╨───────────────────── 
*┱✿ Ek Waqt Mai Teen Talaaq _,*

┱ Log Apni Jaan per bhi Zyadti karte hai'n k ek Saath Teen Talaaq ki Teeno Goliya'n Chhod dete hai'n , Shari'at Talaaq hi ki mukhalif Hai fir wo ek Saath teeno Talaaq dene ki kese ijazat de sakti Hai ,fir bhi agar Koi Shakhs ek Saath Teen Talaaq de hi de to Teeno Talaaqe Waq'a ho jati hai ,

┱ Isi tarah agar Koi Shakhs iddat guzarne se pehle mukhalif Awqaat mai teen Talaaqe de de ya har paaki ke Zamane mai Ek Talaaq diya Kare to is tarah se Teen Talaaqe Waq'a ho jati hai ,

"__ Teen Talaaqo ke Baad Ruju Ka Haq nahi rehta ,balki Aapas ki Razamandi se dobara Nikaah bhi nahi ho Sakta , Teen Talaaq pane wali Aurar Talaaq dene wale Shohar ke Nikaah mai dobara Usi soorat mai ja sakti Hai k iddat guzaar Kar kisi doosre Musalman se uska Nikaah ho ,Fir wo usse Miya Bivi Wala Kaam karne ke Baad Talaaq de de ya Mar Jaye ,iske baad iddat guzaar Kar pehle Shohar se Nikaah ho Sakta Hai , isko " Halala " kehte hai'n, 

*┱  Teen Talaaq ke bare mai Chaaro Imaamo Ka Mazhab_,*___ Baaz log ye samajhte hai'n k Ek Saath Teen Talaaqe dene se ek hi Talaaq maani jati hai aur Ruju Ka Haq baqi rehta Hai aur ise Hazrat imaam Shafa'i Reh. Ka mazhab batate hai'n ,Ye bilkul Galat Hai , Chaaro Imaamo Ka mazhab ye Hai k ek majlis mai Teen Talaaqe de ya Alag Alag Kar ke har paaki ke Zamane mai Ek Talaaq de ,Bahar haal Teeno Talaaqe Waq'a ho jati hai aur Ruju Ka Haq Khatm ho jata hai aur iske baad bager Halala ke Aapas mai dono Ka Nikaah nahi ho Sakta _,"

*┱ Faayda_,* _ Ek ya do Ruju'i Talaaq de Kar agar iddat ke andar Ruju Ka liya to is tarah se Bivi bana Kar rakhna to Jaa'iz ho jayega Magar Talaaq Khatm na hogi Kyunki agar Kabhi ek ke Baad do Talaaqe aur de di ya do ke Baad ek Talaaq aur de di to Pehli Talaaq hisaab mai lag Kar Teeno Talaaqe mil Kar Muglazah Talaaq ho jayegi aur Jo Teen Talaaqo Ka hukm Hai Wahi laagu ho jayega , Khoob Samajh Lena chahiye, Wallahu Aalam ,

╨───────────────────── 
*┱✿ Teen Talaaq Ke Baad Halaala Ke Bager Dobara Nikaah nahi ho Sakta,*

┱ Hazrat Ayesha Raziyallahu Anha se rivayat Hai k Rifa'a Qurazi 
Ki ( Saabqa ) Bivi Huzoor Aqdas Sallallahu Alaihivasallam ke Paas aayi aur Arz Kiya - Mai'n ( Pehle )Rifa'a ke paas thi ( Yani Unke Nikaah mai thi ) unhone mujhe Pakki Talaaq de di ( Yani Teen Talaaqe de kar juda Kar di ,Unki iddat guzarne ke Baad) Maine Abdur Rahman bin Zuber Raziyallahu Anhu se Nikaah kiya ( Unko izdewazi huqooq ada karne ke qabil nahi paya ) Unke paas esi Cheez Hai Jese Kapde Ka pallu ,

Aap Sallallahu Alaihivasallam ne mazkura Khatoon ki Baat sun Kar farmaya- Kya tum ye chahti ho k ( usse Talaaq le kar iddat guzarne ke Baad ) Rifa'a se dobara Nikaah Kar lu ?

Unhone arz Kiya- Ji Haa'n , Mai'n yahi chahti hu'n ,

Aap Sallallahu Alaihivasallam ne farmaya - nahi ( esa nahi ho Sakta , Rifa'a ke Nikaah mai Jane Ka Koi Raasta nahi ) Jab Tak Tum is Doosre Shohar se thodi lazzat haasil na Kar lo aur wo tumse thodi lazzat haasil na Kar le _,"

* Al Masabeh- 284 Ba hawala Bukhari v Muslim,*

*┱ Tashreeh_,* _ Teen Talaaqo ke Baad Aapas mai bager Halala ke dobara Nikaah bhi nahi Sakta , Lihaza  Mard ko chahiye k kisi Musalman Aurat se Nikaah Kar le Jisse Nibaah ho sake aur Aurat kisi doosre Musalman Mard  se nikaah Kar le Jiske Saath guzara ho sake ,

┱ Jab Teen Talaaq Milne wali Aurat ne iddat guzarne ke Baad kisi doosre Mard se Nikaah Kar liya aur Shohar ne Miya Bivi Wala Kaam bhi Kar liya fir Talaaq de di ya wafaat pa gaya to iddat guzaar Kar pehle Shohar se dobara Nikaah ho Sakta Hai ,

┱ Agar doosre Shohar se Sirf Nikaah ho Jaye aur Nikaah Kar ke Talaaq de de ya Mar Jaye to Pehle Shohar ke liye Halaal na hogi , Halaal hone ki ye Shart Hai k Doosra Shohar us Aurat se Miya Bivi Wala khaas Kaam bhi Kar le uske baad Talaaq de ya wafaat pa Jaye aur iddat bhi guzar Jaye ,

╨───────────────────── 
*┱✿ Halaala Mai Shart Ya Mu'ahida Jaa'iz Nahi_,*

┱ Halaala Ye matlab Qata'i nahi Hai k Aurat ya Mard ko targeeb di ja rahi Hai k kisi Musalman se Khwahi na Khwahi zaroor us Aurat Ka Nikaah Kiya Jaye ,Fir usse Talaaq li Jaye Taki Pehle Shohar se Nikaah Kar le ,

┱ _ Amuman esa hota Hai k Jab Koi Shakhs Teen Talaaqe de kar Pachhtata Hai aur Mufti se maloom karne per pata chalta Hai k dobara Nikaah karne Ka bhi Koi Raasta nahi raha , Sivaye iske k kisi doosre Mard se us Aurat Ka Nikaah ho aur Halaala ki Sab Soorte poori ho to Aurat se Zid karta Hai k tu Fala Mard se Nikaah Kar le, Halanki ab wo pehle Shohar ki marzi ki paband nahi rahi , Wo Jis Musalman Mard se chahe Nikaah kare aur Jitne Mahar per Kare Usko Akhtyar Hai balki agar usne kisi Mard se Nikaah Kar liya aur usne Talaaq de di ya Mar gaya tab bhi Aurat ko Majboor nahi Kiya ja sakta k pehle Shohar se Nikaah Kar le ,

┱_ Bil farz Agar Aurat is Baat per raazi ho Jaye k iddat guzarne ke Baad kisi aur Shakhs se Nikaah Kar le fir Halaala ki Sharte poori karne ke Baad Pehle Shohar se Nikaah karne Ka izhaar Kar de Tab bhi ye Jaa'iz nahi Hai k Kisi Shakhs se ye Mu'ahida Kiya Jaye k Tum is Aurat se Nikaah Kar lo aur Halaala ki Sharte poori kar ke Talaaq de dena Taki Pehle Shohar se Nikaah ho sake ,Esa Maamla aur Mu'ahida Shar'an Mamnu Hai ,

Hazrat Abdullah bin Masoud Raziyallahu Anhu se rivayat Hai k Rasulullah Sallallahu Alaihivasallam ne Laanat farmayi Hai " Muhallil " per aur " Muhallal " per ,

*( Mishkaat Sharif)*

"_ "Muhallil " wo Shakhs Hai Jo Halaal Kar ke de Yani Jo is Shart ko manzoor Kar ke Nikaah kar le k Halaala Ke Baad Talaaq de dega , Aur " MuhallalLahu " Wo Hai Jisne Teen Talaaqe di thi ,Yani Pehla Shohar Jo ye Shart laga Kar kisi se Apni Talaaq shuda Bivi Ka Nikaah karata Hai k tum isko ek do raat rakh Kar Chhod Dena ,

┱ _Dekhiye dono per Laanat farmayi Hai, isliye Halaala ki Shart per Nikaah Karna aur karana Gunaah Hai , Lekin is tarah Shart laga Kar Kisi ne Nikaah Kara Diya aur Halaala ki Sharte poori ho gayi to Pehle Shohar ke liye Halaal ho jayegi Yani wo usse Nikaah Kar sakega Jo Aurat ki marzi se hoga , 
  
╨───────────────────── 
*┱✿ Khula'a Karne Ka Tareeqa _,*

┱ Hazrat Abdullah bin Abbaas Raziyallahu Anhu se rivayat Hai k Saabit bin Qais Raziyallahu Anhu ki Bivi ( Jamila Ya Habeeba ) Huzoor Aqdas Sallallahu Alaihivasallam ke Paas aayi aur Arz Kiya k - Ya Rasulallah ! Saabit bin Qais Raziyallahu Anhu Jo mere Shohar hai'n Mujhe Unki aadat v Khaslat aur Deendari ke bare mai Koi naraazgi nahi Hai,

( Kyunki wo Deendaar bhi hai'n aur Akhlaaq bhi Achchhe hai'n ,is Sab  ke bavjood Meri Tabiyat Ka unse Jod nahi khata aur Unke Saath rehne ko ji nahi chahta ,is Soorat mai agar Mai'n Unke Saath rahu to Unke Huqooq zaaya hone Ka Andesha Hai ,Ek Achchhe Aadmi ke Saath rahu aur Wo akhrajaat bardasht Kare aur uske huqooq ki na ho ye na-Shukri ki Baat Hai )

Lekin Mai'n Musalman Hote hue na-Shukri ko na pasand karti hu'n ,( Lihaza Meri aur Unki Judaai ho Jaye to behtar Hai )

┱ _ Ye Sun Kar Huzoor Aqdas Sallallahu Alaihivasallam ne farmaya- Kya ( Talaaq Ke Badle ) Tum uska Bagicha waapas Kar dogi ? ( Jo usne Mahar mai Diya Hai )

Jawab mai Unhone kaha k - Haa'n Mai'n waapas kar dungi ,

Aap Sallallahu Alaihivasallam ne ye sun kar Hazrat Saabit bin Qais Raziyallahu Anhu se farmaya k Tum Baagicha qubool Kar lo ( aur iske evaz ) isko Talaaq de do _,"

* Mishkaatul Masabeh- 283 Ba hawala Bukhari*

┱ Islami Talimaat ka Asal Rukh ye Hai k Nikaah Ka Maamla aur Mu'ahida Umar bhar me Liye ho ,Isko todne aur Khatm Karne ki kabhi nobat hi na aaye ,Kyunki Judaai Ka Asar Sirf Fareeqeen hi per nahi Padta balki iski vajah se nasal v Aulaad ki tabaahi v barbaadi hoti Hai aur Baaz Awqaat khandano mai fasaad Tak ki nobat aati Hai ,

┱ Isliye Jo Asbaab aur vajah is maamle ko todne Ka sabab ban sakte hai'n islami Talimaat ne un tamaam Asbaabo ko Raaste se hatane Ka poora intezam kiya Hai ,

┱ Lekin baaz Awqaat Esi Soorte bhi pesh aati hai'n k islaah ki tamaam koshishe nakaam ho jati hai aur mil kar rehna azaab ban Jata Hai, Esi haalat mai Talluq Ka Khatm Kar Dena hi Raahat aur salaamti Ka baa'is hota Hai , isliye Shari'at ne doosre mazhabo ki tarah ye bhi nahi Kiya k Rishta har haal mai toota hi rahe , iske Liye Talaaq aur Fiskh Nikaah Ka qanoon banaya ,

┱_ Talaaq Ka Akhtyar to Sirf Mard ko Diya Jisme aadtan Fikro tadabbur aur Tahammul Ka maadda Aurat se zyada hota Hai ,Lekin Aurat ko bilkul is Haq se mehroom nahi rakha k wo Shohar ke zulm v Sitam sehne per Majboor ho ,balki usko ye Haq Diya k Apne Shohar ko kisi vajah se itna na pasand karti ho k uske Saath kisi qeemat per bhi Nibaah Karna mumkin na ho to iska behtreen tareeqa to yahi Hai k Wo Shohar ko samjha bujha kar Talaaq dene per amaada Kar le , Esi Soorat mai Shohar ko bhi chahiye k Jab Wo Nikaah ke riahte ko khushgawari ke Saath nibhta na dekhe aur ab ye Mehsoos kare aur ye meahsoos Kare k ab Rishta dono ke liye naqabile bardasht bojh ke Siva kuchh nahi raha to wo Sharafat ke Saath Apni Bivi ko Ek Talaaq de kar Chhod de Taki iddat guzarne ke Baad wo jaha chahe Nikaah kar sake ,

┱_ Lekin agar Shohar is Baat per raazi na ho to Aurat ko ye Akhtyar Diya gaya Hai k Wo Shohar ko kuchh maali mu'awza Pesh Kar ke usse Talaaq haasil kar le , Umuman is garz ke liye Aurat Mahar maaf kar deti Hai aur Shohar use qubool Kar ke Aurat ko azaad Kar deta Hai ,iske Liye Shari'at e islami mai Jo Khaas tareeqa muqarrar Hai use Khula'a kaha Jata Hai ,Nikaah aur Doosre Shara'i mamlaat ki tarah Khul'aa bhi ijaab v qubool ke zariye Anjaam paya Jata Hai , Lekin agar zyadti Mard ki taraf se ho to Fuqha Ka is per ittefaaq Hai k Shohar ke liye Mu'awza Lena Jaa'iz nahi , use chahiye k Mu'awza ke bager Aurat ko Talaaq de de ,Esi Soorat mai agar Mard Mu'awza Lega to gunahgaar hoga ,

┱_ Agar Koi Aurat Maal ke badle mai Talaaq maange to Shohar per Waajib nahi k uski Baat qubool kare , Yaha ye Baat qabile zikr Hai k Huzoor Aqdas Sallallahu Alaihivasallam ne Hazrat Saabit bin Qais Raziyallahu Anhu ko Baag qubool Kar ke Ek Talaaq dene ko farmaya , Maal ke badle Jo Talaaq di Jaye wo Baa'in hoti Hai ,Chahe ek ho ya do ho , Shara'i Lafzo mai Baa'in Talaaq Ke Baad agar Fir Aapas mai Sulah ho Jaye to Aapas mai dobara Nikaah Kar sakte hai'n, Teen Talaaq dene ke Baad Halaala ke bager dobara Nikaah bhi nahi ho Sakta ,isliye Teen Talaaq se Mana farmaya aur Maal le kar Talaaq di Jaye to Wo Ruju'i isliye nahi hoti k agar Shohar Ruju Kar lega to Aurat ki Jaan na chhotegi aur uska Maal zaaya jayega ,

"__ Yaha ye Baat bhi qabile tavajjoh Hai k Jab Hazrat Saabit bin Qais Raziyallahu Anhu ki Bivi ne Apni napasandi Ka izhaar kiya to Huzoor Aqdas Sallallahu Alaihivasallam ne Unki naqawari ke peshe Nazar Nikaah Fiskh nahi farmaya balki Shohar ko Mahar mai Diya hua Baagicha waapas dila kar Talaaq dilaye ,

╨───────────────────── 
*┱✿ _Chand Aham Masa'il ,*

*┱ Masla-1* _ Jab Aurat ne Shohar se kaha k Jo mera Mahar Waajib hai uske badle Meri Jaan Chhod de ya is qadar Rupiye ke badle mujhe Chhod de , Fir iske Jawab mai Mard ne Usi majlis mai Keh Diya k " Maine Chhod di ," to isse ek Baa'in Talaaq Waq'a ho gayi aur Mard ko Ruju Ka Haq nahi raha ,

"__Mard Aurat Ka Sawal Jawab  dono ek hi Majlis mai hone chahiye , Agar Aurat ne Apni Baat Kahi aur Mard ke jawab dene se pehle dono mai se koi Waha'n se uth gaya to Baat Khatm ho gayi ,Ab agar Mard Kahe k Talaaq deta hu'n to Talaaq ho jayegi Magar Aurat per kuchh ( Dena ) Waajib nahi hoga ,Aur Qanoon Talaaq Ke mutabiq Saaf Lafzo mai ek ya do Talaaq dega to Ruju Ka Haq hoga aur Teen Talaaqe dega to Muglazah Talaaq ho jayegi, Ye Tafseel is Soorat mai Hai jabki Aurat ne pehle peshkash ki ho ,

*┱_ Masla-2* _ Aur agar Mard ne Baat kehne mai Pesh qadmi ki aur usne kaha k Maine tujhse itni raqam per ya Mahar ki evaz Khula'a kiya aur Aurat ne kaha k Maine qubool kiya to Khula'a ho gaya , Jo Talaaqe Baa'in ke hukm mai hoga ,

"__Agar Aurat ne Usi jagah jawab nahi Diya aur Waha se uth khadi Hui iske baad manzoori di ya qubool hi nahi Kiya Maslan bilkul khamosh reh gayi Ya Mard ki pesh kash ko radd Kar diya to isse Koi Talaaq nahi hogi ,Aur agar Mard ki pesh Kash ke Baad Aurat Apni jagah bethi rahi aur Mard Apni Baat Keh Kar chalta bana aur Aurat ne uske uth Jane ke Baad qubool kiya tab bhi Khula'a ho gaya ,

*┱-Masla-3*_ Jab Mard ne kaha k Maine tujhse Khula'a kiya ,Aurat ne kaha k Maine qubool kiya, Rupiya Paisa ya Mahar ki waapsi Ka ya baqiya Mahar ko evaz mai lagane Ka Koi zikr na hua tab bhi Jo Maali Haq Mard Ka Aurat per Hai ya Aurat Ka Maali Haq Mard per ho Sab maaf ho gaya ,

"__Albatta agar Aurat poora Mahar pa chuki Hai to is Soorat mai uska waapas Karna Waajib nahi ,Albatta iddat Khatm hone ke Tak Naan Nafqa aur Rehne ka Makaan Aurat ke liye Dena Shohar per Laazim hoga , Haa'n agar Aurat ne is Sakhawat se kaam liya k Jaan chhudane ke liye ye bhi Keh Diya k Mujhse Khula'a Kar le Roti Kapda bhi iddat ke Dino mai tujhse na lungi ,to wo maaf ho gaya ,

*┱ Masla-4 _* Agar Mahaz Raqam ki evaz Khula'a kiya ,Maslan Yu kaha k Hazaaro Rupiye ke evaz mai Khula'a karta hu'n aur Aurat ne qubool kiya to ye Hazaaro Rupiye Aurat per Waajib ho gaye , Chahe isse pehle Apna Mahar let chuki ho ya abhi vasool Karna baqi ho , Agar abhi Mahar na liya ho wo na milega Kyunki Khula'a ki vajah se maaf ho gaya aur Aurat per Laazim hoga k Shohar ko Tay Shuda Hazaar Rupiye ada kare ,

*__Wallahu Aalam __,*

*┱ Masla -5_*_Aurat ne kaha k Mujhe Talaaq de,Mard ne Jawab mai kaha k Tu Apna Mahar vagera Sab haq maaf Kar de to Talaaq de du , is per Aurat ne kaha k Achchha maaf kiya , ya likh Kar de diya ,Fir Shohar ne Talaaq nahi di ,To kuchh maaf nahi hoga , Agar Shohar isi majlis mai Talaaq de to Aurat Ka maaf Karna motbar hoga Varna wo Apna Haq vasool Kar sakegi ,

*┱ Masla-6_* Agar Mard ne zabardasti maar peet Kar Aurat ko Khula'a Karne per Majboor Kar diya aur uski Zubaan se Khula'a karne Ka lafz kehalwa liya ya likhe hue Khula'a Naame per Angutha lagwa liya ya Dastkhat karwa liye aur kaha k Khula'a karta hu'n, To isse Talaaq Waq'a ho jayegi Lekin Aurat per Maal Waajib nahi hoga ,Aur na Uska Koi Haq maaf hi hoga, Agar Mahar baqi Hai to Shohar per uska ada Karna Waajib rahega,

*┱ Masla -7_* Agar kisi Shohar ne Aurat ki jaanib se Kaagaz likh liya k Maine Mahar ya Apne digar huqooq ke evaz mai Talaaq Lena manzoor Kar liya aur use dikhaye bager kuchh aur Baat samjha Kar Dastkhat karwa liye ya Angutha lagwa liya to kuchh maaf nahi hoga ,

"__ Albatta agar Shohar ne kaha k Maine Talaaq de di ya Khula'a kiya Hai , to Talaaq Waq'a ho jayegi, Agar Shohar ne Court mai Kaagaz pesh Kar ke Duniya wale Haakimo ke Yaha maafi Ka faisla karwa liya to wo motbar nahi hoga Aur Qayamat ke Din Jab Roze Jaza ke waqt jab Allah Ta'ala ke saamne peshi hogi to us Maal ke badle Nekiya'n deni hogi ya Aurat ke gunaah Apne sar per lene honge ,

┱ Ye Sab Tafsilaat humne ye batane ke liye likhi hai'n k Khula'a dono ke darmiyan Tay hone Wala Maamla Hai , Koi ek Fareeq khud se faisla nahi kar Sakta ,

╨───────────────────── 
*┱✿ Aaj Ke Daur Ke Judge Ke Gair Shara'i Faisle - Khula'a aur Nikaah Fiskh ke bare mai,( ZaroorPadhiye)*

┱ - Aaj  ke Zamane mai Hukkaam ( Judge ) ne ye Tareeqa Akhtyar Kar rakha hai k jaha'n Aurat ne Court mai arzi lagayi ,istegasa kiya Nikaah Fiskh karne Ka faisla de diya aur iska Naam Khula'a rakh diya, Ye Sarasar gair Shara'i tareeqa Hai ,

"__Baaz martaba Shohar Tak Samman pahunchta bhi nahi ya Wo Adalat mai haazir hota Hai aur Bivi ko Bivi ki tarah Adaygi ke huqooq ke Saath rakhna chahta Hai fir bhi Baaz Judge Nikaah Fiskh Ka faisla de dete hai'n ,aur Aurat ki napasandi hi ko  Khula'a Ka Haq istemal karne ki daleel bana Kar Judaai Ka faisla dete hai'n ,Ye Tareeqa Duniya ke Hukaamo ke qanoon se chahe Jod khata ho Magar Shari'at ke bilkul khilaf Hai, Ye na to Shara'i Khula'a Hai ( Kyunki faisla Mard ki marzi ke bager Diya Jata Hai ) aur na is tarah Fiskh Kar dene se Nikaah Fiskh hota Hai , Aur ese Faisle ke Baad doosre Mard se Nikaah Karna Durust nahi hota , *( Khoob Samajh lijiye )*

┱ Baaz Halaat mai Muslim Haakim ko Nikaah Fiskh Kar dene Ka Haq Hai ,Magar makhsoos Asbaab aur Makhsoos Tareeqe ke bager Nikaah Fiskh Kar dene se Nikaah Fiskh nahi ho Sakta ,

*┱_ Wo Asbaab Jinki Vajah se Nikaah Fiskh Karne Ka Akhtyar Hai, Wo ye hai'n --* 
1- Shohar ka Pagal hona ,
2- Muta'anat hona Yani Jo Naan Nafqa na de ,
3- Na Mard hona ,
4- Gumshuda hona ,Jiski Maut aur Hayaat Ka pata na ho ,
5- Gair Mafqood hona ya Gaayab hona Yani Jiski Zindagi Ka ilm to Hai Magar pata nahi k kaha'n Hai ,

"__ in Asbaab ki buniyad per Makhsoos Sharto aur Hudood v Quyood ke Saath Muslim Haakim Nikaah Fiskh Kar Sakta Hai Jo Kitaab " Al Hilatun Naajzah " mai likhi Hai , Yaad rahe k Kaafir Judge ( Qadyani ,Isaai vagera ) ke Fiskh Karne se Nikaah Fiskh na hoga , Agarche Asbaab v Shara'it Ka lihaaz karte hue Fiskh Kare ,

*Wallahu Aalam _,*

╨───────────────────── 
*┱✿ Iddate Talaaq aur Iddate Wafaat_*

┱ _Rivayat Hai k Sahabiya Subi'a Raziyallahu Anha Ke Batan se Unki Shohar ki wafaat ke Chand Din ke baad Bachcha paida ho gaya ,Wo Huzoor Sallallahu Alaihivasallam ki khidmat mai haazir Hui aur ( Chunki Wiladat hone ki vajah se iddat Khatm ho chuki thi) isliye unhone kisi doosre Mard se Nikaah ki ijazat chaahi , Chunache Aap Sallallahu Alaihivasallam ne ijazat de di aur unhone Nikaah Kar liya _,*

* Mishkaatul Masabeh-288 Ba hawala Bukhari,*

┱_ Jab Koi Mard Apni Bivi ko Talaaq de de ya Mar Jaye to Aurat per iddat guzaarna Laazim Hota Hai, Yani Shari'at ke usool ke mutabiq makhsoos v muqarrar ayyaam guzar Jane Tak kisi doosre Mard se Nikaah karne ki ijazat nahi hoti aur iske alawa bhi iddat ke dauran kuchh aur Pabandiya'n aa'id ( Lagu ) ho jati hai ,

┱_ Jab Kisi Aurat ko Talaaq ho Jaye to dekha jayega k ye Shohar ke yaha'n gayi Hai ya nahi gayi Hai ,Agar Shohar ke yaha'n nahi gayi Yani Miya Bivi mai yakjaa'i nahi Hui aur Sirf Nikaah ke Baad Talaaq ho gayi to Esi Aurat per Koi iddat Laazim nahi ,Jesa k Qur'an e Paak mai ishara Hai --

"__ Ey imaan Walo Jab Musalman Aurto'n se Nikaah Karo Fir Tum unko qabl ( pehle ) haath lagane ke Talaaq de do to Tumhare liye un per Koi iddat nahi Jisko tum shumaar karne Lago to unko kuchh mata'a de do aur khoobi ke Saath unko rukhsat Kar do _," *( Tarjuma- Surah Al Ahzaab)* 

┱_ Aur Nikaah ke Baad Miya Bivi mai yakjaa'i ho chuki Hai to dekha jayega k Aurat ko Hamal Hai ya nahi , Agar Aurat ko Hamal ho to uski iddat Waz'a Hamal per hogi Yani jab tak Bachcha Paida na ho Jaye us Waqt Tak iddat mai rahegi,  Chahe ek Din Baad Bachcha Ho jaye ,Chahe Mahine lag Jaye ya Saal ya isse bhi zyada lag Jaye , (Yaad rahe Shari'at mai iddat ki muddat zyada se zyada do saal Hai ) ,

"_Aur agar Hamal na ho to uski iddat ye Hai k Teen Maahwari guzar Jaye ,iske Liye Koi muddat muqarrar nahi Hai , Jitne Din mai Teen Haiz guzre utne Din iddat Hai , *- iddat Ka madaar Hamal hone ki Soorat mai Waz'a Hamal per aur Hamal na hone ki Soorat mai Teen Haiz guzar jane per Hai ,*

*┱ Masla_* Agar Kisi Ko esi Haalat mai Talaaq Hui k use ab Tak Haiz nahi aaya ya zyada Umar hone ki vajah se Haiz aana band ho gaya to uski iddat Teen Maah Hai ,Ye Teen Maah Chaand Ke Hisaab se Shumaar honge , Qur'an e Paak mai Surah Baqrah aur Surah Talaaq mai Masla Bayan farmaya Hai,

┱_ Ab rahi Wo Aurat Jiska Shohar wafaat pa chuka ho uski iddat mai ye Tafseel Hai k agar wo Hamal se hai to jab bhi Waz'a Hamal ho Jaye us Waqt uski iddat khatm ho jayegi ,Agarche Shohar ki wafaat ke do Chaar hi guzre ho ,ya isse bhi Kam Waqt guzra ho , Aur agar Hamal ki muddat bad Jaye to uske baqadar iddat ke ayyaam bad jayenge aur agar ye iddat Hamal se nahi Hai to uski iddat Chaand ke aitbaar se Chaar Mahine Das Din Hai ,Haiz aata ho ya na aata ho ,

*┱_ Masla_* Jis Aurat Ka Nikaah usoole Shari'at ke mutabiq kisi Musalman Haakim ne Fiskh kiya ho us per bhi iddat Laazim Hai ,aur use bhi Iddate Poori karni hogi ,
_Jis Aurat ne Shohar se Khula'a kar li ho use bhi Iddate Talaaq guzaarni hogi ,

*┱ Masla_* Jis Aurat ko Talaaq de di gayi ho uske iddat ke Zamane Ka naan Nafqa aur Rehne ka Ghar Talaaq dene wale Shohar ke Zimme Hai basharte k Aurat Shohar ke diye hue us Ghar mai iddat guzaare Jisme Talaaq se pehle rehti thi ,Agar Maa'n Baap ke Ghar chali Jaye to Shohar per ayyaame iddat Ka naan Nafqa waajib nahi hoga ,Yaad rahe Shohar hi ke Ghar per guzaarna laazim Hai , Jaha'n rehte hue Talaaq Hui aur Talaaqe Baa'in ya Muglazah ho to Shohar se Parda kar ke rahe ,

"__ Agar Aurat Ayyaame iddat Ka naan Nafqa maaf Kar de to maaf ho jayega ,

*┱ Masla_* Jis Aurat Ka Shohar wafaat pa Jaye us Aurat ke liye Shohar ke Maal mai miraas to Hai Lekin iddat Ka naan Nafqa nahi Aur agar Mahar Vasool na hua ho aur Maaf bhi nahi kiya ho to Hissa e Miraas se Pehle Mahar Vasool karegi ,

*┱ Masla_* Agar Kisi Aurat se is Shart per Nikaah kiya Tha k Mahar na milega ya Nikaah ke Waqt Mahar Ka Koi tazkira na hua ho Fir Miya Bivi Wali Yakjaa'i hone se pehle Talaaq de di to Shohar per Laazim Hai k us Aurat ko Chaar Kapdo Ka ek Joda Apni haisiyat ke mutabiq de , Kapde ye hai'n - Ek Kurta ,Ek Pajaama ya Salwaar ,Ek Dupatta aur Ek badi Chaadar Jisme sar se Paanv Tak lipat sake ,Aur Agar Mahar muqarrar kiye bager Nikaah karne ke Baad Shohar ko Miya Bivi Wali Tanhaai bhi haasil ho gayi ya Wo Mar gaya to Mahare Misl Dena hoga ,Yani itna Mahar hoga Jitna us Aurat ke Maayke ki us jesi Aurto'n Ka Mahar hua karta Hai ,

*┱ Masla_* Jab Kisi Aurat ko Talaaq ho Jaye ya Shohar wafaat pa Jaye uski iddat Usi Waqt se Shuru ho jati Hai ,agar iddat guzarne ke Baad Aurat ko Talaaq ya Shohar ki Maut Ka pata Chala to Shar'an iddat guzar gayi ,mazeed iddat guzaarne ki zarurat nahi ,

*┱ Masla_*  Agar kisi esi Aurat ko Talaaq Hui jise Haiz aana Shuru nahi hua Tha uski vajah se Mahino ke Hisaab se iddat guzaarne lagi ,Fir Teen Maah guzarne see pehle Haiz aa gaya to ab uski iddat Teen Haiz hogi ,Mahine Ka hisaab khatm ho jayega ,Jab teen Haiz poore ho Jaye us Waqt iddat khatm hogi ,

*┱ Masla_*  Haiz ke Zamane mai Talaaq Dena Jaa'iz nahi Hai Magar Kisi Shari'at Ka Khayal na kiya aur Haiz ke Zamane mai Talaaq de di to Talaaq Waq'a ho jayegi aur uski iddat bhi Teen Haiz hogi aur ye Teen Haiz us Haiz ke alawa honge Jisme usne Di Hai Yani Jis Haiz mai use Talaaq di gayi wo Haiz iddat mai shumaar nahi hoga ,

*┱ Masla_*  Kisi ne Apni Bimari ke Zamane mai Talaaqe Baa'in de di aur Talaaq ki iddat abhi poori nahi hone payi thi k wo Mar gaya to dekha ye jayega k Talaaq ki iddat ki muddat zyada Hai ya Maut ki iddat ki muddat zyada Hai,Jis iddat mai zyada din lagenge wo iddat poori kare aur agar Bimari Talaaq Ruju'i di Hai aur abhi Iddate Ki na guzri thi k Shohar Mar gaya to us Aurat per wafaat ki iddat Laazim Hai ,

*Wallahu Aalam __,*

╨───────────────────── 
*┱✿ Iddat Ke Ayyaam Mai Sog Karna Bhi Waajib Hai-*

┱ _ Hazrat Umme Salma Raziyallahu Anha se rivayat Hai k Huzoor Aqdas Sallallahu Alaihivasallam ne irshad farmaya k Jis Aurat Ka Shohar wafaat pa gaya wo ( iddat guzarne Tak ) asfar se ranga hua aur khushbu wali mitti see ranga hua Kapda na pehne aur Zever bhi na pehne aur Khizaab bhi na lagaye aur Surma na lagaye ,"

* Mishkaatul Masabeh-289 Ba hawala Abu Daowd v Nasa'i,*

*┱ Tashreeh _,* Jab Aurat ko Talaaq ho Jaye ya uska Shohar wafaat pa Jaye to iddat khatm hone Tak usko Usi Ghar mai rehna zaruri hai Jisme Shohar ke Nikaah mai Hote hue Aakhir Waqt Tak raha karti thi, us Ghar ko Chhod kar doosre Ghar mai Jana Jaa'iz nahi Hai ,Bahut si Aurte'n Shohar ki Maut Hote hi ya Talaaq Hote hi Maayke chali jati hai'n ,Ye Khilafe Shara'a Hai aur gunaah Hai , Na uska Jana Jaa'iz Hai ,na Sasural walo ko usko nikaalna Durust Hai ,

┱ Albatta Jo Aurat Beva ho gayi ho aur uske Naan Nafqe Ka Koi intezam na ho to kisi hagah Kaam kaaj Kar ke rozi haasil karne ke liye Ghar se Bahar ja sakti Hai Lekin Suraj chhipne se pehle pehle Usi Ghar mai aa Jaye Jisme Shohar ke Saath rehti thi,

┱ Iddat ke dauran kisi ek hi kamre ya kothri mai bethe rehna zaruri nahi Hai ,na ye Koi Masla Hai ,Jesa k Aurte'n samajhti hai'n ( balki Ghar mai rehte hue Poore Ghar mai chale fire is per kuchh pabandi nahi Hai ),

┱ _ Jis Aurat ko Ruju'i Talaaq mili ho iddat ke Dino mai usko bhi Ghar se nikalna Durust nahi Hai ,Wo bhi Shohar ke Ghar mai iddat guzaare , Jo Aurat iddat mai ho ghar se nikalne ki pabandi ke Saath us per Sog karne ki pabandi bhi aa'id ki gayi hai , Zaibo Zeenat ,Banaav singaar tark karne ko Sog kehte hai'n ,

┱_ Chunki iddat ke Zamane mai kisi doosre se Nikaah karna Durust nahi aur Banaav singaar ki zarurat Shohar ke Liye hoti Hai,isliye iddat ke Zamane mai Sog karne Ka hukm Diya gaya, Jiska matlab ye Hai k Aurat esa libaas aur esa Banaav singaar rang dhang Akhtyar na kare Jisse uski taraf Mardo ki Tabiyat ragib ho , Lihaza iddat guzarne wali Aurat ke liye Laazim Hai k Bhadakdaar Kapda na pehne ,Khushbu na lagaye , Khushbu wale Kapde na pehne , Zever istemal na kare ,Baareek daanto ki kanghi se Baal na suljhaye aur Sar mai Tel na daale aur Surma na lagaye ,Sar dhona ,Gusl karna Durust Hai Lekin Khushbu daar Sabun vagera istemal na kare , Jis Aurat per Sog Waajib Hai use paan Khana ,Phool pehanna ,Mehndi lagana ,Hont aur Nakhoon per surkhi lagana Durust nahi Hai ,

*┱_ Masla_* Sog Karna Hukme Shara'i Hai ,Shohar ke Marne ya Talaaq v Khula'a ke zariye isse chhutkara haasil hone se Agar Aurat ko Khushi bhi Hui ho tab bhi Sog Karna Waajib hai ,

*┱ Masla_,* Agar Court ke zariye Nikaah Fiskh Kar Diya ho ( aur Wo Shara'i usool ke mutabiq fiskh ho gaya ho ) to Esi Aurat per bhi iddat aur Sog Waajib Hai ,

*┱ Masla_,* Agar Na-baalig Ladki ko Talaaq mil gayi ya uska Shohar Mar gaya to us per Sog Waajib nahi Hai ,

*┱ Masla_,* Jis Aurat ko Talaaq Baa'in ya Talaaqe Muglazah mili ho us per ye bhi Waajib Hai k Zamana e iddat mai Talaaq dene wale Shohar ke Ghar per rehte hue usse Parda Kare aur Jisko Talaaqe Ruju'i mili ho wo zebo Zeenat se rahe ,Sog na kare ,

╨───────────────────── 
*┱✿ Zamana E Jahiliyat Mai ( islam se Pehle ) iddat Kese Guzari Jati Thi,*

┱ _ Hazrat Umme Salma Raziyallahu Anha ka Bayan Hai  k Ek Sahabi Khatoon Huzoor Aqdas Sallallahu Alaihivasallam ki khidmat mai haazir Hui aur Arz Kiya k Ya Rasulallah Sallallahu Alaihivasallam Meri Ladki Ka Shohar faut ho gaya hai aur uski Aankho mai takleef hai ,Kya hum uski Aankho mai Surma laga sakte hai'n ?

Aap Sallallahu Alaihivasallam ne farmaya- nahi !

Do ya Teen baar yahi Sawal v jawab hua , Aap Sallallahu Alaihivasallam ne har baar yahi farmaya nahi laga sakte , iske baad Rahmate Aalam Sallallahu Alaihivasallam ne farmaya k -
( Shari'at e islam mai ) ye iddat aur Sog ke Chaar Maah aur Das Din hai'n. ( Iski pabandi mushkil maloom ho rahi Hai ) Halanki Jahiliyat ke Zamane mai Jab kisi Aurat ka Shohar Mar Jata To Poore ek saal iddat guzaarti thi aur ek saal khatm ho Kar jab Doosra saal lagta Tha to ( Ount vagera ki ) mengniya'n fenkti thi _,"

* Mishkaatul Masabeh-288 Ba hawala Bukhari v Muslim,*

*┱ Tashreeh_,* _Islam se pehle Zamana e Jahiliyat mai Mukhtalif ilaaqo aur qaumo mai Shohar ke Mar Jane per uski Beva per tarah tarah ke ahkaam aa'id kiye Jate they ,Hinduo mai to ye qanoon Tha k Beva ko Apne murda Shohar ke Saath zinda jal Jana padhta Tha ,isko Sati hona kehte they ,aur Arab mai ye Tareeqa Tha k Jab Aurat Ka Shohar Mar Jata Tha to ek saal usko ghutna hota Tha, Jiski Tafseel Sunan Abu Daowd mai is tarah Hai ,

┱ _ Jab kisi Aurat ka Shohar Mar Jata Tha to saal bhar ke liye ek Chhoti si Kothri mai dakhil ho jati thi aur badtareen Kapde pehan leti thi ,aur Saal guzarne Tak na Khushbu lagati thi na aur Koi Cheez ( Safaai suthraai ki ) Apne Badan se chhuwati thi, Jab saal khatm ho jata to koi chhar paya( Jaanwar) Gadha ,Bakri ya Parinda uske paas laya Jata Tha Jisse wo Apni Sharm ki jagah ko ragadti thi ,( Ye Kaam Totke ke Tor per karti thi aur isko musibat door karne Ka zariya samjha Jata Tha)

┱ Chunki saal bhar Tak badhaali mai Reh Kar uske Badan mai Zehreele asraat paida ho Jate they,isliye jis Jaanwar se wo Apne Jism ka makhsoos hissa ragadti thi aksar Mar Jata Tha, iske baad ( Kothri se ) nikalti aur usko Ount vagera ki mengniya'n di jati thi Wo un mengniyo'n ko aage pichhe fenkti thi, isse logo ko maloom ho jata Tha k uski iddat guzar gayi hai aur isse ye faal Lena bhi maqsood Tha k musibat fenk di , Jesa k ye mengniya'n fenki ja rahi Hai , iske baad Apni marzi ke mutabiq Khushbu vagera istemal karti thi ,

* Sunan Abu Daowd,*

┱_ Huzoor Aqdas Sallallahu Alaihivasallam ne Jahiliyat ki ye Pabandiya'n Yaad dila Kar farmaya k islam ne Sirf Chaar Maah Das Din ki iddat aur Sog rakha hai, Jahiliyat ki kesi kesi musibato se tumhari Jaan chhudayi Hai , Fir bhi islam ke qanoon ki paasdari se bachne Ka Raasta nikaalna chahte hai'n ,

┱_ is Hadees se maloom hua k Aankh mai takleef hone ke bavjood Huzoor Aqdas Sallallahu Alaihivasallam ne iddat wali ko Sog mai Surma lagane ki ijazat nahi di , Hadees ki Sharah likhne wale Ulmao ne bataya Hai k esa maloom hota Hai k us Aurat Ka ilaaj surme ke bager ho Sakta Tha ,aur Surma Bator Zeenat ke lagana chahti thi, isliye Mana farmaya , Kyunki Umme Salma Raziyallahu Anha ka Fatwa Hai ( Jo Sog wali Hadees ki Raavi hai'n ) k Sog wali Aurat ilaaj ki majboori se Raat ko Surma laga sakti Hai ,

╨───────────────────── 
*┱✿ Beva Ho Jaye to Doosra Nikaah Kar le , isko Ayb Samajhna Jahalat hai_,*

┱ _ Doosre Mazhabo mai ye ayb ya bura samjha Jata Hai k Shohar ki Maut ke baad Aurat kisi doosre Mard se Shaadi Kare , Har Waqt Ka jalaapa aur Saas Nando ke taane usko ba izzat Zindagi guzarne nahi dete they ,

┱_ Mazhabi qanoon aur Qaumi rivaajo ke mutabiq Bewa hi poori Zindagi guzaarna laazim Tha , Chahe Na-baalig Ladki Bewa ho Jaye aur Chunki Shohar ki Arthi ke Saath chalna Mazhabi Masla Tha aur Sab Nafrat aur hiqarat Ka bartaav karte they ,isliye Chahe na chahe Shohar ki Arthi ke Mai kood padti thi aur zinda jal Jane Nafrat ki Zindagi se behtar samajhti thi,

┱_ Lekin islam ne na Sirf ijazat di balki targeeb di aur mustahab v mustahsan balki Bahut se Halaat mai Waajib qaraar diya k iddat guzarne ke Baad Aurat doosre Mard se Nikaah Kar le, Wo Mar Jaye to teesra Shohar Kar le ,Wo bhi Mar Jaye to chothe Mard ki joziyat mai aa Jaye, Huzoor Aqdas Sallallahu Alaihivasallam ne is per Amal Kar ke dikhaya , Aap Sallallahu Alaihivasallam ki aksar Biviya'n Bewa thi Jinke pehle Shohar faut ho chuke they , Unme Baaz wo thi Jo Aap Sallallahu Alaihivasallam se pehle Do Shoharo ke Nikaah mai Reh chuki thi ,

┱_ Aaj Kal bhi Bahut si qaumo mai ( Halanki inme kuchh Musalman bhi kehlati hai'n ) Bewa ki Doosri Shaadi ko ayb ya bura samjha Jata Hai aur Jo Bewa ho jaye Zindagi bhar yu'n hi bager Shohar bethi rehti hai'n , Khuda ki panaah Allah ke Rasool Sallallahu Alaihivasallam ne Jo Kaam Kiya ho use ayb samjhna Bahut badi Jahalat Hai , isse imaan salb ho jane Ka khatra Hai , Jin logo ke ese khayalaat hai'n wo tauba Kare , Islam ne Aurat ko bada martaba dilaya aur usko aizaaz v ikraam se nawaza Hai , Pasti se nikaal Kar usko bulandi ataa ki Hai Lekin Afsos Hai k Aurte'n ab bhi islam ke ahkaam ( Jo Rehmat Hai ) ko Chhod kar Jahiliyat ki taraf daud rahi hai'n ,

╨───────────────────── 
╨───────────────────── 
*┱✿ Shohar Ke alawa Kisi Ki Maut Per Sog Karna _,*

┱ _ Hazrat Abu Salma Raziyallahu Anhu ki Sahabzadi Hazrat Zenab Raziyallahu Anha ne Bayan farmaya k Jab Ummul Momineen Hazrat Umme Habeeba Raziyallahu Anha ko ( Unke Walid ) Hazrat Abu Sufiyaan Raziyallahu Anhu ki Maut ki khabar pahunchi to unhone Teesre Din Khushbu mangayi Jo zard rang ki thi aur Apni Baanho aur rukhsaro per mali aur farmaya k--
"_ mujhe iski zarurat na thi ( Lekin is dar se kahi teen din se zyada Sog karne waliyo mai shumaar na ho jaau'n Maine Khushbu lagayi ) Maine Nabi Kareem Sallallahu Alaihivasallam ko farmate hue Suna Hai k Esi Aurat ke liye Jo Allah per aur Akhirat ke din per imaan rakhti ho ye Halaal nahi hai k ( Kisi Mayyat Per ) Teen Din Teen Raat se zyada Sog kare Sivaye Shohar ke k us ( ki Maut ho Jane ) per Chaar Maah Das Din Sog Kare __,"

*🗂 Sahih Muslim - 1/487 ,*

*┱ _Tashreeh _* _ Jis Kapde se Mardo ko kashish hoti ho usko na pehne aur Khushbu,Surma ,Mehndi aur Zaibo Zeenat ki Doosri cheeze tark karne ko Sog kehte hai'n , Kya Shohar ke alawa Kisi ki Maut per Sog karne ki gunzaish Hai ? Agar gunzaish Hai to Kitne Din Sog kiya ja sakta Hai ? Iska Jawab is Hadees mai Diya gaya Hai k Shohar ke alawa doosre kisi azeez qareeb ( Beta ,Baap ,Bhai vagera ) ki Maut per bhi Aurat ko Sog karne ki ijazat Hai Lekin Sirf Teen Din Teen Raat Tak Sog Kar sakti Hai, isse zyada Sog Karna Halaal nahi Hai ,

┱_ Aaj Kal ek badi musibat Hai k Amal karne ke liye Nabi Kareem Sallallahu Alaihivasallam ke A'amaal v Aqwaal ko saamne nahi rakha Jata balki Rivaaj aur Tabiyat ke taqazo per chalte hai'n, Shohar ki Maut per Sog karne ke liye kaha Jata To usko bura maanti Hai ,balki iddat ke Zamane mai Ghar mai rehne ki Shara'i pabandi ki bhi khilaf varzi karti hai'n aur Khud se sog karne per aaye to Shohar ke alawa Kisi doosre Rishtedar ki Maut per Hafto Mahino Sog Kar leti hai'n , Deeni Ahkaam ko pashe pusht daalne Ka ye mizaaj Bahut bura Hai , iski vajah se gunaho mai izafa hota hi Chala Jata Hai,             

╨───────────────────── 
*┱✿ Talaaq ho Jaye To Bachcho ki Parwarish Kon Kare,*

┱ _ Hazrat Abdullah bin Umar Raziyallahu Anhu se rivayat Hai k Ek Aurat ne arz Kiya- Ya Rasulallah ! Beshak ye Jo mera Beta hai, Mera Pet iske Liye Bartan reh chuka Hai aur Meri chhaati iske Liye Mashkiza rahi Hai ( Jisse ye doodh pita raha Hai ) aur Meri Goad iske Liye Hifazat ki jagah rahi Hai aur ab maajra ye Hai k iske Baap ne mujhe Talaaq de di Hai aur isko Mujhse alhida karna chahta Hai,

Iske jawab mai Huzoor Aqdas Sallallahu Alaihivasallam ne farmaya k - Tu iski Parwarish ki zyada mustahiq Hai Jab Tak k tu Nikaah na Kar le _,"

*🗂 Mishkaatul Masabeh - 293 Ba hawala Ahmad v Abi Daowd,*

*┱ Tashreeh_,* Allah Ta'ala ne insaano mai tawalid aur tanasul Ka Silsila Jaari rakha hai, Bachche Nadaan na samajh aur Za'ief paida Hote hai'n, Unki Parwarish Maa'n Baap ke zimme ki gayi Hai ,Wo Shara'n bhi Unki Parwarish ke mukallif hai'n aur taba'i Tor per bhi , Bachche Maa'n Baap ke saaye mai hi palte badte hai'n aur falte foolte hai'n ,

┱_ Lekin kabhi Shari'at ke mizaaj ke khilaf Miya Bivi Judaai Ka Kaam Kar bethe Yani dono mai alhaidgi ya Talaaq ho Jaye to isme Jaha'n aur Kai qism ki Takleefe saamne aati hai'n Unme Bachcho ki Parwarish Ka Masla bhi ek musibat ban Jata Hai, Shari'at ne iske bare mai bhi Hidayat di Hai aur ahkaam bataye hai'n ,

┱ _ Aulaad ki Parwarish ke liye Huzoor Sallallahu Alaihivasallam ne ye zaabta batlaya Hai k Bachcho ki Maa'n Parwarish ki zyada mustahiq Hai Basharte k kisi Shakhs se Nikaah na Kare, Hadees ki Sharah likhne wale Ulmao ne bataya Hai k agar Aurat bilkul kisi se Nikaah na Kare to Haq Parwarish milega aur agar kisi ese Shakhs se Nikaah Kar le Jo Bachche Ka Mahram ho Maslan Bachche Ka chacha ho tab bhi Maa'n Ka Haq Parwarish saaqit na hoga , Kyunki Bachche Ka Mahram khud usko pyaar Muhabbat se rakhega aur uske Nikaah mai Jane ke Baad Bachche ki Maa'n uski dekh bhaal mai lagegi to naye Shohar ko naqawari na hogi ,

┱_ Albatta agar Bachche ki Maa'n kisi ese Shakhs se Nikaah Kar le Jo Bachche Ka Mahram na ho to uska Haq Parwarish saaqit ho jayega , Kyunki wo Shakhs uski Parwarish mai lagne per aitraaz Karega aur ye Keh Sakta Hai k tu mere huqooq Ada nahi karti ya mere huqooq mai iski vajah se Farq aata Hai , Mumkin Hai k Wo Bachche ko tedi Nazar se dekhe aur Bachche ko daant dapat Kare aur ye bhi Mumkin Hai k Uski Pehli Bivi se jo Aulaad ho ya Usi Bivi se jo Aulaad ho Jaye uski Muhabbat ke saamne us Bachche se kisi qism ki Takleefe Mehsoos kare , in jesi Hikmato ki vajah se Maa'n Ka Haq Parwarish is Soorat mai saaqit Kar diya gaya Hai Jabki wo Bachche ke na mehram se Nikaah kare ,

┱_ Maa'n ko Jo Parwarish Ka Haq Diya Jata Hai Wo uska Haq Hai ,Agar wo Apne Haq Ka istemal na karna Chahe to usko Majboor nahi Kar sakte k zaroor Parwarish Kare , Haa'n agar Koi aur Aurat Parwarish karne wali na mile to uski Maa'n ko Majboor Kiya jayega k uski Parwarish Kare ,aur agar Maa'n ne Parwarish Ka Haq saaqit Kar diya to Shar'an Jitni muddat Parwarish karne Ka haq rakha gaya us muddat ke andar andar fir Apna Haq le sakti Hai, Yani Parwarish Ka Mutalba Kar sakti Hai ,isi tarah agar doosre Shohar se Judaai ho Jaye to fir bhi Haq Parwarish Ka Mutalba Kar sakti Hai,
             

╨───────────────────── 
*┱✿ Bachche Ki Parwarish Ke Mutalliq Chand Aham Masa'il_,*

┱ _ 1- Jis Zamane mai Bachche ki Maa'n Talaaq Ke Baad iddat guzaar rahi Ho Usi Zamane mai Jo Bachcha uski Parwarish mai ho uske doodh pilane ki ujrat na le Albatta iddat guzarne tak Shohar per ( iddat guzarne wali hone ki vajah se ) naan Nafqa Waajib Hai,

┱ _2- Agar Talaaq Ke Baad iddat guzar gayi to Bachche ki Maa'n ko uske Baap se Doodh pilane ki ujrat talab karne Ka haq Hai aur is Soorat mai Baap ke Liye Jaa'iz nahi k wo yu'n Kahe k jab ujrat dena hi Hai to Mai'n kisi doosri Aurat se ujrat per doodh pila lunga ,( Chunki Jo Shafqat Maa'n ko ho sakti Hai Doosri Aurat ko nahi ho sakti ) , Haa'n agar Doosri Aurat Maa'n se kam ujrat per raazi ho to Maa'n ko ye Haq haasil na hoga k Bachche ko khud doodh pila de aur ujrat zyada le , Albatta Maa'n ko itna Haq Hai k doodh pilane wali Aurat ko apne paas rakhe Taki Bachche se Judaai na ho aur agar Maa'n doodh pilane per razamand ho Lekin uska doodh Bachche ke liye muzir ho to Doosri Aurat se Doodh pilwa Sakta Hai,

┱_3-- Agar Maa'n Kahe k Mai'n ise doodh nahi pilati to use Majboor nahi Kiya ja sakta Haa'n agar Bachcha kisi aur Aurat Ka doodh qubool hi na Kare to Maa'n per Waajib Hai k use doodh pilaye,

┱_4-- Jo Maa'n Badkaar ho Jiske fisq v fijoor Ka Asar Bachche per padh Sakta ho to Bachche ko jab tak samajh na aaye usko Maa'n ke paas rakha ja sakta Hai, uske Baad usse le liya jayega aur agar Koi Maa'n Esi Hai k Bachche ko Chhod kar Aksar Awqaat baahar rehti hai aur Bachche ki dekh bhaal nahi karti Jisse uske zaay hone Ka khatra hai to is Soorat mai use Haq Parwarish nahi diya jayega,

┱_5-- Agar Bachche ki Maa'n Mar Jaye ya Haq Parwarish istemal na Kare Yani parwarish ke liye inkaar Kar de ya kisi vajah se uska Haq Parwarish saaqit ho Jaye to is Soorat mai Parwarish Ka Haq Naani ko pahunchta Hai , Agar Naani na ho ya mojood to ho Lekin Parwarish se inkaar kar de to Daadi ko aur uske baad Baap Shareek Behno ko aur agar in me se Koi na ho ya Haq Parwarish istemal karne se inkaar Kare to fir Khaala ko aur uske baad Foofi ko Haq Parwarish milega ,Wo bhi na ho ya Haq Parwarish istemal na Kare to Maa'n ki Khaala ,fir Baap ki Khaala ko Haq pahunchega , Yaad rahe k Bachcha Chahe kisi ki bhi Parwarish mai rahe Bachche ka kharch Baap ke zimme honge ,

┱_6--Bachche ke rishtedaro mai agar Koi Aurat Parwarish ke liye na mile to ab Baap uski Parwarish Karne ka mustahiq hai ,Wo bhi na ho to Fir Daada ,Fir Pardaada , in me se Koi na ho to Sage Bhai ko fir Baap Shareek Bhai Jo Haq pahunchta Hai, wo bhi na ho to Jab kabhi esa waqi'a pesh aaye to Mo'atbar Aalimo se maloom kar liya Jaye ,

┱_7-- Jise Bachche ki Parwarish Ka Haq pahunchta Hai use Ladke ko Saat saal ki Umar ho Jane Tak aur Ladki ko 9 ( No ) Saal ki Umar ho Jane Tak Parwarish Ka Haq milega Yani itni muddat Tak Apne paas rakh Kar Parwarish karne Ka haq Hai,

*__Wallahu Aalam _'*
                
▦══─────────────══▦

ReF✿┅╮    
         *🗂 Tohfa E Khawateen,*
                  ╨─────────────────────